Dialuna na Rosario y otro ciudad di Argentina e poblacion a participa den velorio di cinco Argentino, cu a bira victima fatal di e atake terorista na New York, siman cu a pasa.
E cahanan cu curpa di Hernán Ferrucchi, Alejandro Pagnucco, Hernán Mendoza y Diego Angelini a keda instala na diferente sala di un funerario conoci como Caramuto na Rosario, situa na 300 kilometer na norte di Buenos Aires.
E curpa di Ariel Erlij a ser hiba pa un sala di santana El Prado na un suburbio di Rosario. Tur cinco victima tabata forma parti di un grupo di 10 amigo, cu siman pasa a yega New York pa celebra e aniversario di 30 aña di nan graduacion na e colegio tecnico di Rosario.
Nan a muri dia 31 di october despues cu un persona di 29 aña a dal e ciudadanonan Argentino aki cu un pickup, riba un caminda na sur di Manhattan. E atacante ta bibo ainda y awor y mester dilanti autoridadnan hudicial pa e delito di terorismo.
Den e atentado aki otro cinco Argentino mas a sobrevivi, entre nan tin Martín Marro cu ta biba cerca di Boston y cu awor ta den recuperacion di su heridanan.
Presidente Argentino Mauricio Macri a participa dialuna den un homenahe na tur e victimanan di e incidente na Manhattan, caminda e terorista a core dal e grupo di ciclista y persona na pia cu su auto. Den e atake e terorista a mata en total ocho persona.
Macri hunto su casa Juliana Awada y Bill Blasio cu ta alcalde di New York a deposita un ofrenda floral na e caminda, unda e sucedido a tuma lugar.
“Esaki mester uni nos cada vez mas. Resalta e conviccion di paz y e miho manera pa sigui bataya pa paz ta sigui cu nos bida. Loke e hendenan ey ta busca ta cu nos ta drenta den panico,” e presidente a declara.
