Gobierno Mexicano y experto di Alto Comisionado di Derecho Humano di Nacionnan Uni a pidi pa detene ehecucion di Ruben Cardenas, cu tabata planifica pa diaranson pasa na Texas. E solicitud a ser haci na autoridadnan pasobra nan ta denuncia cu e no a haya un huicio husto.

Cardenas a ser declara culpabel di secuestro y asesinato di su prima na aña 1997. E no a haya e derecho basico di comunica cu consulado di Mexico, pa dun’e atencion y pa por garantisa cu e huicio ta bay conforme e debido proceso,” asina Alejandro Alday, consultor huridico di canciyeria Mexicano a splica.

Gobierno Mexicano a recorda cu Cardenas ta un di 51 Mexicano cu a ser condena na pena di morto na Merca y cu a haya un beneficio na aña 2004, despues di un decision di corte penal internacional, segun cual husticia di Merca a nenga nan e derecho di asistencia di consulado, manera convencion di Viena ta stipula.

Nos ta lansa un yamado pa anula e condena di morto aki y pa asina logra cu Cardenas lo por haya un huicio nobo, cu por cumpli cu norma internacional relaciona cu debido proceso y huicio husto,” asina un comunicado di Alto Comisionado a splica.

Den huicio di e 51 Mexicanonan aki cu ta forma parti di e asina yama caso Avena, Mexico, sin pronuncia opinion tocante e probable culpabilidad o inocencia di e acusadonan, ta demanda pa repiti e procesonan cu e debido asistencia consular.