Cu e ultimo casonan grandi di atencion nacional, manera e reapertura di e refineria, y e caso di ‘all-inclusive’ nos por ripara den practica kico ta pasa ora tin un falta di respet completo di gobierno pa duna pueblo e informacion cu e mester y tin derecho di haya.
Den ambos caso, pero nan no ta unico, ta bisto cu e informacion duna te awor no ta completo y cu pa pueblo por forma un opinion basa riba hecho, mester haya tur informacion. Mas ainda, ora e asunto ta yega parlamento, mesun rekisito aki ta aplica; tur miembro mester dispone di e mesun informacion y esun cu mester duna esaki, ta gobierno. Den caso di e propuesta di ley di all-inclusive, ta resulta awor cu tur e fraccionnan den parlamento kier mira e famoso rapport di PWC, di cual solamente a sali un resumen y cu tampoco a keda distribui. Sin embargo, e ministro ta mantene su posicion y actitud di soberbia, cu aunke e mes den e memoria splicativo di e ley ta referi na e rapport, e ta keda nenga redondamente di pone e rapport na disposicion no solamente di e ciudadano, sino tambe di e organo supuestamente mas halto di nos sistema democratico. Y kico ta e miedo cu e por tin? Pasobra despues di lesa e rapport, si acaso tin algo aden cu no ta conveni e ministro, gobierno tin suficiente medio di intimidacion na su disposicion pa percura cu en todo caso diesun di nan ‘olimpicamente’ no a lesa e partinan fastioso aki, y seguidamente ta vota manera bon mucha na fabor di e ley.
Pakico? Pasobra ningun di nan ta bay core e riesgo cu proximo dia di entrega di lista pa eleccion nan ta haya e sorpresa cu nan nomber no ta ni aparece riba e lista cu e lider ta bay entrega na Conseho Electoral. Di e manera aki e ministro por gana riba dos tereno: el a practica transparencia y el a mustra e B-team den parlamento nan luga den partido… E hecho cu oposicion ta haya oportunidad pa grita y sapatia cu rapport den man no ta haci ningun diferencia; mayoria di prensa cu ta bon bao control di gobierno no ta ni haci caso di nan. E poco medionan di comunicacion cu ta purba haci un diferencia honesto pa trece informacion obhetivo ta demasiado poco (ainda) pa percura pa suficiente bon informacion. Nos no ta kere, o miho bisa, nos no tin e ilusion cu e ministro ta bay cambia di opinion y lo mas probabel ta cu partido en berdad lo forsa e ‘sirvientenan’ den parlamento pa aproba e ley manera e ta, sin mira rapport.
E otro caso grandi den e dianan aki ta e asunto di e refineria, cu inmediatamente despues di firmamento di e acuerdo y contractnan na Caracas a bira blanco di critica di diferente banda. E critica den e caso aki no por spera esey di banda di oposicion cu ainda ta purba gana voto cu e ponencia cu ta e parlamentario, cu tin un talento nato pa bira amigo cu hende di reputacion dudoso, a logra habri e refineria atrobe. Loke a conduci na cierto transparencia a bin di un banda totalmente inespera y esey ta di e propio compania CITGO Petroleum Corporation, cu pa prome biaha a pone un comunicado di prensa riba nan website desde cu nan a cuminsa negocia cu gobierno na september aña pasa. Kico gobierno ta core haci? Bay San Nicolas core duna ‘informacion’ na esnan cu nan ta invita pa scucha nan storia di gloria y heroismo, pero no ta duna cara ni na pueblo ni na parlamento, contestando e preguntanan urgente cu a surgi. E pregunta a base di e informacion di e compania mes, cu supuestamente lo mester a bay carga henter e proyecto aki, pero awor ta bisa cu nan ta bay yuda so cu asistencia tecnico y conseho y cu mester bay busca placa fia otro caminda… Anto gobierno tin e pudor di uza e palabra ‘transparencia’ den nan propaganda, mientras nan keto bay ta papia di e yegada di gas como un hecho consumi, mientras cu no tin nada ainda y ta awor no mas lo bay studia e posibilidad di trece gas Aruba. No cu nos ta contra yegada di gas, pasobra e por tin mas uzo cu solamente e refineria, pa WEB por ehemplo pa uza en bes di fuel oil. Pero loke ta indigna hende ta e forma con ta tuma hende haci, manera un politico por a haci ainda cincuenta aña pasa. Nan ta lubida cu nos ta biba riba e isla mas conecta cu internet den henter Caribe y esey ta danki na e Arubiano mes, no na gobierno. Con tal cu nos ta un gran cantidad di hende cu no tin pakico di kere un politico riba su palabra, pasobra por averigua facilmente si e ta papia berdad of no. Si ainda nan ta desea di practica e arte di sconde cos, nos ta desea nan hopi exito…
