dav

Despues di par di dia cu prensa regional ta descubri cu Aruba Airlines ta exigiendo personanan Venezolano cu ta biaha pa Aruba firma un declaracion cu nan no lo pidi asilo riba e isla, gobierno di Aruba ayera atardi a declara cu nan no ta e autor di e documento aki, publica den e edicion aki.

Segun fuente RunRun.es, periodista Bram Ebus tabata e prome cu a señala e existencia di tal documento riba Twitter. A surgi basta comentario di personanan Venezolano cu a declara cu nan tambe mester a firma cu nan no lo pidi asilo na momento cu nan a yega Aruba, cu nan nunca a wordo persigui pa un gobierno, y cu nan ta biahando pa Aruba pa rasonnan turistico of di negoshi solamente.

Te ainda Aruba Airlines no a reacciona riba esaki. Bon Dia Aruba a purba haya contacto cu e aereolinea ayera pero no a logra haya un representante cu por a papia riba e asunto riba telefon, mirando cu tabata un dia di fiesta. Bon Dia lo busca declaracion oficial di e compania pa haya sa di unda e documento aki a sali y dicon e aereolinea ta pidi esaki di cierto pasaheronan.

Pidi asilo ta un derecho humano.
Expertonan legal, manera Rocío San Miguel, a indica cu e documento aki no tin ningun validez huridico contra e persona cu firm’e. Contrariamente, esaki por hasta carga consecuencia pa e compania pa a atenta ‘violacionnan grandi contra derechonan humano’.

Human Rights Defense Curacao, un fundacion cu ta ocupa cu defende derechonan humano na Corsou, tambe a cuestiona si un compania tin mag di exigi tal declaracion di un biahero, mirando cu e derecho pa pidi asilo ta un derecho humano hancra den ley internacional, incluyendo e declaracion universal di derechonan humano di Nacionnan Uni, articulo 14, y e protocol di refugiado, cual Aruba tambe a firma (New York, 1967).

LEAVE A REPLY

Please enter your comment!
Please enter your name here