Aña 2019 tabata un aña hopi positivo pa Banco di Seguro Social SVb, esaki ta refleha den e cifranan cu su director, Edwin Jacobs a duna di conoce algun dia pasa.

El a splica cu durante e aña ey, departamento di Impuesto a recauda 8.2% mas na prima di AOV y AWW – cu ta pension di behes, huerfano y viuda – compara cu 2018, cu a pasa e limite di 300 miyon florin.

Na aña 2018 a colecta 286.9 miyon florin y 2019 tabata di 310.6 miyon florin, un aumento di 8.2%, loke pa nan a resulta hopi positivo. Nan ta mira cu e desaroyo aki no ta di un solo biaha, pero ta kere ta cu departamento di Impuesto a haci nan esfuerso pa percura pa companianan cumpli cu nan obligacion.

Jacobs a expresa cu esaki ta un mehoracion di conformidad di esunnan cu tin obligacion di paga prima di AOV y AWW. Tambe el a sigura cu Banco di Seguro Social a gradici e departamento menciona pa e esfuerso cu nan a haci pa aumenta e cumplimento cu prima di AOV y AWW, loke por trece un efecto positivo den recuperacion di e fondo di pension di behes.

Di mesun manera el a informa cu aña pasa e cantidad di trahado registra na SVb pa seguro di malesa y accidente a aumenta cu 3%. A pasa di 42.500 pa 43.876 hende sigura.

Jacobs a comenta cu na momento cu ta registra mas asegurado e entradanan ta subi. Tambe a mira e cantidad di beneficio cu SVb mester a paga a disminui levemente den seguro di malesa, a yega na un reduccion di 2.3% y den parti di seguro di accidente a paga 3.8% mas.

Sinembargo, Jacobs a manifesta cu e fondo di malesa tin un deficit di 2.2 miyon, mientras cu e seguro di accidente lo conoce un surplus di 5.5 miyon. Segun e mes a bisa, un ta haci un balans pa otro. Na final ta premira cu e aña aki lo bira uno positivo pa e dos fondonan cu ta cay bao di seguro di trahado.

Pa loke ta trata fondo di pension di behes, huerfano y viudez, ta mira cu esun di behes a aumenta cu 1.8%. Esaki pa Jacobs ta core paralelo na e aumento gradual di cantidad di pensionado. E suma cu nan a paga na AOV aña pasa a aumenta cu 2.2%. Pa un parti esaki ta debi na e hecho cu a adapta e pension na inflacion, y ta mantene e maneho di por adapta e pension na aumento di costo di bida, pa mantene poder di compra di e pension di AOV.

Den mesun linea, e cantidad di prima a aumenta, loke a traduci su mes den un aumento di e surplus di 17 miyon florin na 2018, pa 31.9 miyon florin na 2019; un aumento di 86% di e surplus, cual ta bay aporta na e reserva.

El a bisa cu ta importante pa tene na cuenta cu den e añanan aki cu ta aumenta e edad gradualmente, y ta reservando pa tin un bon suma di surplus. Esaki pa motibo cu mester traha reserva pa e momento cu e edad di pension yega 65 aña, y cu desde e momento ey e cantidad di pensionado cu ta cuminsa haya AOV lo bira mas grandi.

Jacobs a menciona cu tin actualmente 700 pa 800 pensionado cu ta registra pa aña. Ta bay yega e momento na aña 2025 cu lo drenta aproximadamente di 1.400 pa 1.500 pensionado cada aña. Na e momento ey, e gastonan di e fondo ta aumenta mucho mas cu e 2.2% di 2019.

Pa aña 2027 y 2028 ta bay aparece un deficit atrobe den e fondo di behes. Cu e strategia cu segun Jacobs kier implementa, e deficit aki lo wordo cubri cu e reserva cu ta trahando aworaki.

Tambe el a sigura cu pa aña 2030 lo mester tin solucion pa con lo sigui mantene e fondo pagabel pa e siguiente 15 of 20 aña, pa e siguiente generacion por tin un bon pension di behes, igual pa tur hende cu ta gosa di pension na e momentonan aki.

Pa cu e fondo di viudez y huerfano, Jacobs a informa cu e cantidad a disminui cu 3 pensionado menos. E gastonan a aumenta debi na e sistema automatico di pension di huerfano y viudez cu ta subi segun edad. Esaki ta cera cu un resultado positivo di 4.4 miyon florin, cual tambe ta bay forma parti di e fondo di reserva.

 

LEAVE A REPLY

Please enter your comment!
Please enter your name here