Prijs di combustibel a bolbe subi, y nos tur ta kehando, atrobe. Esunnan menos informa ta crea tur tipo di teoria di conspiracion politico, pa splica pakico nos mester paga mas. En corto e teoria principal ta, cu gobierno mester di placa y por lo tanto ta aumenta prijs di gasolin, diesel y otro tipo di producto petrolero cu nos ta importa pa nos economia y comunidad por funciona.

Esey ta parti di e storia. Gobierno en berdad ta aumentando e accijns na momento cu prijs di combustibel baha, pa yega na e nivel cu e accijns tabatin anteriormente. Esey por comprende, pero manera semper no ta duna claridad di antemano, y ta warda e cos explota den publicidad pa e ora core bay paga candela. E fenomeno ey nos ta keda mir’e. Recientemente esaki a sucede tambe cu e asunto di e banconan comercial, cu a anuncia cu nan ta bay cobra BBO/etc. riba e compensacion di transaccion bancario, cu anteriormente, desde 2007, tabata liber di pago di e impuesto aki. Un periodista opositor ta utilisa e anuncio aki pa crea henter un discusion inutil y innecesario. Pero bon, ta algo cu gobierno mes mester resolve.

Pa sigui cu e tema; fuera di e accijns riba combustibel, cuanto influencia gobierno por/mester tin riba prijs di combustibel? No tanto, y laga nos splica pakico. Na prome luga, gobierno tin funcionario publico na departamento di Asunto Economico cu tin como tarea pa sigui e cambionan den prijs di crudo riba mercado. Pa esaki a scoge pa e prijsnan manera S&P Global Platts ta sigui y publica esakinan. Tur hende por bay riba website di Platts (www.platts.com) y haya un splicacion extenso di e metodologia cu nan ta uza pa calcula diferente prijs di crudo y producto petrolero, pa diferente region na mundo. Problema di tempo lo impedi cu nos lo bay vigila trabao di e funcionarionan aki y ta confia cu nan ta haci nan trabao bon. Esun cu no tin e confiansa ey ta liber pa haci su investigacion.

Recientemente gobierno a anuncia cu ta considera busca otro metodologia pa calcula prijs promedio pa yega na calcula un aumento o rebaho rasonabel di prijs di combustibel. Nos por imagina cu por tin miho metodo pa yega na e calculacion hustifica. Esey pasobra nunca prijs di gasolin o diesel ta sigui e prijs di crudo 100%, pa e simpel motibo caba cu tin un ‘time lag’ entre e momento cu ta paga un cierto prijs pa crudo, como refineria, y e momento di produci gasolin di e reserva cu e planta tin pa procesa, cu a cumpra na un prijs diferente, sea mas halto o mas abao. Esaki ta un proceso masha normal den comercio. Na juli proximo tambe tur supermercado ta haya nan cu e trabao di cambia prijs di articulo, si e impuesto ta inclui, o dicidi cu no ta aumenta, pero en todo caso e stock ey ta cumpra na cierto nivel di tarifa di BBO/etc.

Pero tin mas factor pa tuma na cuenta, cu no ta bin dilanti den e discusion tocante prijs di combustibel. Esey ta cu e compania cu ta importa e productonan pa nos mester cumpra esakinan na cierto luga y regla y paga transporte te na Aruba. Tur e gastonan ey, ademas esunnan di almacenamento, overhead di e compania, etc. tambe ta hunga un papel importante den yega na un prijs corecto. Gobierno no por djis decreta un prijs cu ta parce nan corecto, pero mester delibera cu e importador y distribuidor pa tene cuenta cu nan situacion, unda nan ta cumpra e productonan y na ki prijs. Otro actor pa tuma na cuenta ta e detayistanan den e cadena di suministro, cu ta e pompnan di combustibel cu ta bende cu e consumidor. Nan mester di un margen rasonabel di ganashi pa por mantene nan servicio.

Tur esaki ta haci cu e ta un proceso bastante elabora cu gobierno mester cana pa mantene e prijsnan na un nivel cu ta cuadra cu e realidad di e sector. Un aspecto cu talbes no ta sali dilanti na prome bista ta e hecho cu awendia e importador y distribuidor ta un compania estatal, 100% propiedad di Refineria di Aruba NV, e compania Fuels Marketing & Supply Aruba (FMSA) NV. Esaki ta haci cu en principio por tin acuerdo di ahustacion di prijs cu ta faborece e compania, y gobierno cu na fin di aña por spera mas dividendo di e operacion comercial aki. Den e caso specifico aki esey lo mester bay via e compania madre (RdA NV) cu lo pasa dividendo pa gobierno. E ta posibel pero no facil, si tin un control efectivo na beneficio di e consumidor riba e operacion di e compania.

Un metodo pa salvaguardia esey, banda di gobierno honesto, ta e transparencia di publicacion di e cuentanan anual di e companianan estatal, asina cu tur persona, tambe prensa y e politico opositor, por consulta esakinan. Un compania estatal cu ta logra ganashi cu eficiencia y bon organisacion, merece elogio. Y esun cu ta cobra di mas, sigur den acuerdo cu un gobierno no honesto, merece critica. Nos mester por evalua esey, semper.