Pdvsa ta cera tres upgrader na Anzoategui; caida grave di produccion

16-03-24_PDVSA.jpg

(Argus/lapatilla.com) – Venezuela su empresa petrolero estatal Pdvsa ta sufriendo un caida grave den su produccion, cerando tres upgrader cu ta procesa crudo ultra pisa di Orinoco cu ta den operacion ainda, pa por ehecuta mantencion extenso y na mes momento resolve e congestion di crudo mehora produci cu no ta sali na tempo for di e pais, asina varios funcionario di Pdvsa a conta e medio specialisa den energia Argus.

Pdvsa tin cuatro upgrader, cu ta parti di e produccion di crudo di e Faha di Orinoco, unda e upgradernan ta produci mas di 600.000 bari pa dia di crudo sintetico. Mayor parti di e ’syncrude’ aki ta pa exportacion via e puerto Jose na Anzoategui, principalmente pa benta na prijs di mercado, banda di e exportacion di crudo dilui (diluted crude oil; DCO) y mescla yama Merey cu ta mas tanto pa cumpli cu compromisonan cu prestamo, principalmente cu China.

Pdvsa a cuminsa tambe restringi produccion di crudo di Orinoco na e posnan, ya cu e problemanan logistico a causa un cantidad di como 30 miyon bari di crudo cu actualmente ta almacena na luga di exporta esaki.

E bottlenecknan ta inclui tambe capacidad di almacenamento cu no ta uzabel y infrastructura portuario di carga inoperabel pa falta di mantencion, cu no por resolve pa falta di medionan financiero y di credito internacional.

Pdvsa su division di Orinoco tabata produci como 800.000 b/d di crudo na april, un caida di mas di 450.000 b/di un produccion oficial di 1,25 miyon bari pa dia na 2016.

Pdvsa su upgrader PetroPiar (210.000 b/d), den cual Chevron tin un participacion di 30%, ta fuera di operacion desde april y lo no cuminsa operacion e luna aki, manera tabata planea. A pospone esaki te posiblemente augustus, pero mester tambe di e material importa pa por produci.

PetroCedeño, e upgrader di 200.000 b/d den cual Total (Francia) y Equinor (Noruega) tin 40% di participacion combina, a cera e siman aki pa reparacion y pasobra e suministro di crudo di parti di Pdvsa no ta suficiente, segun un funcionario di Pdvsa.

E upgrader PetroMonagas di 140.000 b/d den cual Rosneft (Rusia) tin un participacion di 40%, tambe ta bay para operacion e luna aki pa reparacion cu lo tuma por lo menos 60 dia. E turnaround aki tabata planea pa april, pero a keda posponi pa e luna aki.

E upgrader PetroSanFelix di 120.000 b/d, propiedad 100% di Pdvsa, anteriormente yama PetroAnzoategui, tambe lo ta fuera di operacion e luna aki pa reparacion, planea originalmente pa cuminsa na fin di juli.

Pdvsa tabata opera e cuatro upgradernan como un unidad desde e nacionalisacion na 2007.

E retraso den exportacion di crudo a cuminsa luna pasa, causa pa e embargo di ConocoPhillips riba e facilidadnan di almacenamento di Pdvsa den Caribe, cu a causa un problema pa exporta sin miedo pa mas embargo, y problema di suficiente capacidad pa warda crudo na Venezuela mes.

E embargo ta consecuencia di e caso di arbitrahe cu ConocoPhillips a gana, unda a disputa cu exito e nacionalisacion di interes cu e compania Mericano tabatin den e upgradernan PetroPiar y Petro San Felix, anteriormente conoci como Ameriven y PetroAnzoategui.

Pdvsa a cuminsa proactivamente baha produccion di crudo na e posnan, pa por maneha e problema di almacenamento, treciendo e miembro di OPEC mas cerca di e barera magico negativo di 1 miyon bari pa dia.

Di acuerdo cu e datonan oficial di e ministerio encarga, comunica na OPEC, Venezuela lo a produci 1,533miyon b/d di crudo na mei, un incremento di 28.000 b/d compara cu 1,505miyon b/d na april. Sin embargo, otro fuentenan den e sector publica pa OPEC ta calcula Venezuela su produccion na mei na 1,392miyon b/d, un caida di 42.500 b/d compara cu e 1,434miyon b/d na april. Argus ta calcula e produccion na mei na 1,45miyon b/d.

Funcionarionan di Pdvsa den comunicacion priva ta descarta e cifranan oficial di luna pasa cu ta mustra un aumento. Dos ehecutivo di Pdvsa den seccion di extraccion di crudo ta bisa cu produccion di mei tabata alrededor di 1,44miyon b/d.

Te asina leu den luna di juni, perspectiva pa e produccion Venezolano ta mustra mas grave. Venezuela tabata produciendo como 1,5miyon b/d na inicio di mei, incluyendo como 800.000 b/d di e faha di Orinoco, y 700.000 b/d combina di e otro areanan di oriente y occidente. Pero na inicio di juni produccion total a cay te na entre 1,1 y 1,2 miyon b/d, segun tres funcionario di Pdvsa.

You May Also Like

Produccion di oro di Guyana ta aumenta

Guyana ta bisa cu e ta ‘on track’ pa alcansa un produccion record e ...

Mexico: violencia contra periodista ta aumenta

E reporteronan Miroslava Breach, Ricardo Monlui y Cecilio Pineda a muri a traves di ...

Venezuela: Citgo ta aclara cu ‘negoshi ta sigui’

E compania Mericano propiedad di Pdvsa, Citgo Petroleum Corporation, a traves di un comunicado ...

Uruguay: compensa personanan transsexual pa “daño” causa pa Estado

Gobierno di Uruguay ta considera cu transsexual naci prome cu 1975 pasobra “nan tabata ...

Rusia ta pone beslag riba barco petrolero di PDVSA

Algun luna atras, e compania estatal petrolero Venezolano PDVSA a manda un barco petrolero den ...

Huelga na Avianca leu di un solucion ainda

E huelga di 730 piloto di Avianca, cu ta mantene mita di su operacion ...