Gobierno di Aruba a condena fuertemente e rosamento ilegal di un tereno na Rooi Santo, describiendo e incidente como un acto ilegal y inaceptable bao di ley y regulacionnan vigente tocante planificacion espacial y proteccion ambiental. Durante un conferencia di prensa recien minister di Infrastructura, Energia y Telecomunicacion René Herde a enfatisa cu e accion a viola varios procedemento legal y a reafirma cu ningun proyecto di construccion lo ser permiti den e area afecta.

E incidente a bolbe pone atencion riba e discusion amplio tocante e reto di vivienda cu Aruba ta enfrenta, e maneho di espacio disponible y e necesidad di busca un balansa entre desaroyo economico y conservacion di naturalesa.

Minister Herde a subraya cu ta tanto Gobierno di Aruba, como DIP y DOW a condena e incidente, cual a tuma lugar durante fin di siman cu a pasa caminda un tereno na Rooi Santo a ser rosa sin ningun permiso y sin autorisacion di gobierno, completamente inaceptable.

“Gobierno di Aruba kier enfatisa e importancia di cumpli cu leynan prescribi y procesonan pa planificacion espacial responsable y proteccion di nos recursonan natural limita.” el a bisa.

E mandatario a remarca cu e persona of compania responsable no tabatin ningun di e permiso obligatorio cu mester prome cu cualkier trabao fisico por cuminsa

Minister Herde a splica cu bao di e marco legal di e Ruimtelijk Ontwikkelingsplan met Voorschriften (ROPV), actividadnan cu ta implica rosamento, modificacion of desaroyo di tereno ta suheto na regulacionnan specifico cu tin como meta garantisa un desaroyo balansa y sostenible. E procedementonan aki ta proteha interes publico, fomentando crecemento economico responsable y un uso eficiente di e espacio limita cu Aruba tin disponible.

El a indica cu prome cu un tereno por ser prepara pa desaroyo, e solicitante mester haya un aanlegvergunning. Durante e proceso di evaluacion, instancianan tecnico manera DIP y DOW ta analisa si tin balornan ambiental, ecologico of hidrologico presente riba e propiedad. E revisionnan aki ta inclui estudio di rooinan, flora y fauna protegi, y otro caracteristicanan natural cu ta rekeri proteccion special.

Solamente despues cu e evaluacionnan legalmente rekeri a ser completa, por considera otro permiso necesario, incluyendo permiso di construccion y aprobacion di plannan di parcelacion.

E mandatario a enfatisa cu e procedementonan aki no ta opcional.

“Cumplimento cu e procesonan aki no ta opcional. Bo no por scoge pa haci nan of keda sin haci nan. Nan ta obligatorio. Nan ta existi pa proteha interes publico, pa garantisa cu decisionnan tocante uso di tereno ta tuma lugar na un manera transparente, husto y basa riba evaluacion tecnico di expertonan y pa conserva medio ambiente scars cu nos tin,” el a bisa.

Minister Herde a reconoce cu e caso di Rooi Santo no ta un incidente isola. Gobierno ta reconoce cu tanto den presente como den pasado a surgi situacionnan unda tereno a ser rosa ilegalmente, sin obtene e permiso rekeri, y situacionnan caminda cu condicionnan stipula di permiso no a ser cumpli. E mandatario a subraya cu nan ta consciente cu tin tereno ta ser rosa cu e meta di crea un scenario pa solicita directamente permiso di construccion y asina evita of desvia di e proceso legal cu mester ser sigui pa haya aanlegvergunning.

“E practicanan aki ta rotunadamente ilegal y contrario na e proposito di aplicacion di ley y reglamentonan di Aruba. Gobierno kier manda un señal cla cu e ta condena e accionnan aki cu ta ignora procesonan legal estableci pa desaroyo di tereno,” e mandatario a enfatisa.

E controversia rond di Rooi Santo tambe a pone enfasis nobo riba e importancia ambiental di e sistema natural di rooinan di Aruba.

Minister Herde a splica cu rooinan ta cumpli un papel esencial den maneho di awa durante yobida fuerte y den prevencion di inundacion. Ademas, nan ta funciona como coredor ecologico cu ta sostene biodiversidad y fortalece resiliencia ambiental di e isla.

Aruba ta confrontando un tension creciente entre e necesidad di mas construccion y e obligacion di conserva areanan natural. Crecemento di poblacion, demanda pa vivienda y actividadnan economico ta aumentando presion riba espacio disponible. Na mesun momento, organisacionnan ambiental y profesionalnan den planificacion ta adverti cu desaroyo sin control por deteriora sistemanan natural cu Aruba ta depende riba nan.

Pa hopi observador, e caso di Rooi Santo ta ilustra precisamente e conflicto ey.

Segun minister Herde, permiti construccion den e area afecta lo por empeora problemanan relaciona cu drenahe y maneho di awa durante periodonan di yobida intenso. El a indica cu tin solucionnan tecnico cu por ser considera den cierto circunstancia, pero den e caso aki e compania no a sigui e proceso necesario ni a presenta ningun peticion pa evaluacion.

E debate rond di e caso di Rooi Santo ta tuma lugar memey di un discusion mas amplio tocante e problema di vivienda na Aruba y logra un balansa entre e necesidad di mas casnan y e proteccion di medio ambiente ta birando un meta cada bes mas dificil.

Aruba ta enfrenta varios factor cu ta complica decisionnan tocante uso di tereno, incluyendo crecemento di poblacion, espacio limita, aumento di prijs di propiedad y demanda creciente pa vivienda accesibel. Presion pa construccion ta expande cada biaha mas cerca di areanan cu historicamente tabata considera importante pa conservacion ambiental.

Mientras algun ciudadanonan ta subraya cu Aruba mester identifica mas espacio pa vivienda, otro ta enfatisa cu solucionnan no por bin na costo di sistemanan natural esencial.

Gobierno ta mantene cu futuro strategia di desaroyo mester combina dos obhetivo: crea oportunidadnan pa vivienda y proteha e patrimonio natural di e isla.

Un di e anuncionan principal durante e conferencia di prensa tabata e intencion di gobierno pa fortalece e mecanismonan di control y introduci sancionnan mas efectivo contra violacionnan ambiental.

Minister Herde a reconoce cu actualmente Aruba no tin suficiente instrumento legal pa castiga efectivamente cierto tipo di infraccionnan relaciona cu rosamento ilegal di tereno. Pa e motibo ey, gobierno a instrui e departamentonan relevante pa desaroya regulacion y mecanismonan nobo cu lo fortalece cumplimento di ley.

Segun e mandatario, trabaonan preparatorio pa crea instrumentonan legal contra violacionnan di ley ambiental y di planificacion espacial ta andando caba.

“Fortalecemento di cumplimento, supervision y aplicacion di ley ta forma parti di agenda di gobierno actual. Nos a duna caba instruccion pa bin cu regla y sancionnan pa violacion di e tipo di procesonan aki. Actualmente e trabaonan pa crea instrumentonan legal pa sanciona violacion di ley di medio ambiente ta den preparacion,” el a señala.

Mientras cu e discusion tocante futuro sancionnan ta continua, gobierno a enfatisa cu e proyecto specifico relaciona cu e rosamento di tereno na Rooi Santo no lo haya aprobacion.

Minister Herde a declara cu e clasificacion di e area den e marco di planificacion espacial ta haci construccion incompatible cu e regulacionnan vigente.

“Bao ningun condicion e construccion den e rooi lo a ser permiti,” el a afirma.

El a indica cu e personanan, of e compania, no tabatin aanlegvergunning, permiso pa prepara tereno, no a pidi ontheffingsvergunning pa haci cambionan den e tereno di acuerdo cu ley, no tabatin verkavelingsplan, no tabatin permiso pa construccion y pa e motibo ey nan tabata totalmente fout. Consecuentemente, autoridadnan ta considera cu e iniciativa ta fundamentalmente contrario na ley vigente.

Minister Herde a conclui e conferencia di prensa cu un apelacion na propietario di tereno, desaroyador, contratista y otro actornan relevante pa respeta e marco legal di Aruba.

El a enfatisa cu proteccion ambiental y crecemento economico no mester ser considera como interesnan opuesto, sino como elemento complementario di un modelo di desaroyo sostenible.

“Como un isla chikito cu espacio limita y cu areanan natural cada biaha mas scars, Aruba no por permiti pa perde balornan natural, sistemanan ecologico y patrimonio natural di medio ambiente door di accionnan simplemente pa evita e proceso legal y pa logra metanan cu no ta cuadra cu ley,” e mandatario a indica.

El a agrega cu proteha medio ambiente ta representa un inversion den bienestar, resiliencia y prosperidad di comunidad.

Por ultimo, minister Herde a reafirma cu gobierno ta sigui apoya desaroyo y construccion, specialmente considerando e necesidad creciente pa vivienda y crecemento economico. Sinembargo, el a insisti cu tur proyecto mester sigui e procedementonan legal estableci y respeta e limitacionnan defini den e politica nacional di planificacion espacial.

“Ta inaceptable loke a sucede. Nos tin un keintura di construccion na Aruba, pero no asina. Nos ta sostene desaroyo balansa, pero esaki no ta un ehempel di dje,” el a finalisa.