Gobierno di Corsou ta traha riba desaroyo deportivo conforme e programa di gobernacion. Ministernan sr. Steven Croes y sra. Zita Jesus-Leito den representacion di Gabinete Rhuggenaath ta firma un acuerdo mas pa desaroyo di deporte.

Gobierno pa medio di Ministerio di Enseñansa, Ciencia, Cultura & Deporte i Ministerio di Trafico, Transporte & Planificacion Urbano, a start cu un trayecto pa yega na un maneho nobo for di aña pasa. Conforme e maneho, ta firma acuerdo cu organisacionnan cu ta bin na remarke pa haci esaki segun un lista di criterio pa desaroyo di nos facilidadnan deportivo y veldnan.

E trayecto aki a cuminsa na september 2020 den estrecho cooperacion cu Fundacion Desaroyo Deportivo Corsou (FDDK) caminda Gobierno a firma cu varios organisacion den forma di ‘Drive-Thru’ na Centro Deportivo Corsou.

Siman pasa a firma un acuerdo cu Union Deportivo Koraalspecht hunto cu nos pelotero Ozhaino (Ozzie) Albies pa desaroyo di dos veld den e bario di Koraalspecht. Esaki den presencia di deportista coach Theofilo (Chofi) Veld i muchanan di e bario hunto cu FDDK.

Awe a toca turno pa firma un acuerdo pa desaroyo di veld na tereno di DABA (Dutch Antilles Ballpark Academy) pabou di Sabana Ballpark/hanchi dilanti di Richard ‘Chati’ Constansia banda di Richard Elhage. Ministernan sr. Steven Croes y sra. Zita Jesus-Leito a firma cu astro pelotero sr. Hensley Meulens cu ta representa DABA Fundacion. E acuerdo cu Bambam Meulens tin un duracion di 5 aña cu e posibilidad pa alarga esaki. A base di e acuerdo aki DABA ta bay desaroya un proyecto fantastico pa nos hobennan. E ta encera formacion di hobennan den e deporte di baseball, stimula desaroyo di baseball den e parti di Reino den Caribe, organisa actividadnan di baseball manera clinics, seminario pa coach i training. Tambe e fundacion ta bay percura pa diferente material nobo pa nos hobennan por practica baseball di un manera optimal.

Por mira bek riba un trayecto exitoso y cu ta brinda perspectiva na e desaroyo deportivo. Gobierno a firma cu un total di 13 organisacion den e ultimo temporada aki pa asina desaroyo di deporte por tuma luga y brinda e perspectiva deportivo na nos hobennan.

LEAVE A REPLY

Please enter your comment!
Please enter your name here