editorial

Ciudadano y hues mester haci trabao di gobierno?

Siman cu a termina, ciudadanonan conhunto di vecindario di Malmok a hiba Pais Aruba y e compania Zissu Properties N.V. dilanti hues pa e operacion ilegal di un hotel den e area menciona. E ciudadanonan reuni den un asociacion, cu mester adkiri personeria huridico ainda, a exigi tambe previo na e sentencia poni pa dia 13 di januari, un medida inmediato pa para e operacion di e hotel te cu hues dicta sentencia. Esaki a ser logra, hues tabata di acuerdo pa haci esey y ta bisa den su decision provisional di ta di opinion cu den e caso mes e no ta considera e punto di bista di e habitantenan sin posibilidad pa gana e caso:”Teniendo cuenta (1) cu e caracter di e conflicto, (2) e interesnan di peso di Preserva Malmok c.s. den locual nan a exigi den e caso sumario, y (3) e circunstancia cu e causa di Preserva Malmok c.s. di antemano sigur no por ser considera sin opcion pa gana, e Huzgado su huicio ta cu otorgamento di e medida di orden manera Preserva Malmok c.s. ta visualisa, ta na su luga.”

Loke a capta atencion di banda di actuacion di gobierno (Pais Aruba) tabata algun detaye interesante. Pa cuminsa tabata remarcabel cu Pais Aruba a opone e peticion di Preserva Malmok, cu otro palabra gobierno tabata pro pa e hotel sigui opera! Ta para textualmente den e sentencia:”Zowel het Land alsook Zissu hebben zich verzet tegen toewijzing van de door Preserva Malmok .c.s. verzochte ordemaatregel.”

Di otro banda, ministro encarga cu Desaroyo Teritorial y Infrastructura a manda un carta pa e compania, den cual nan a prohibi nan sigui cu e construccion, mientras cu e compania a declara dilanti hues cu esey ya no ta relevante pasobra nan a caba di construi caba. Pregunta: pakico ministro mester manda un carta ainda dia 8 di december 2015 pa e compania, mientras e por sa di su funcionarionan cu e compania a caba di construi caba? Cu su carta ta ‘mosterd na de maaltijd’? Of ta asina cu a manda carta pa ‘mustra corecto’? Pakico no a actua anto durante e construccion mes ora tur ciego cu a pasa ey banda por a mira cu e edificio ey no ta un cas? E ministro kier pa nos kere anto cu su ambtenaarnan no a duna debido supervision na e obra, cu no ta uno chikito?

Bottom line: pakico den e pais aki mester ta asina cu ta ciudadano mester bay hues pa logra algo cu ta e autoridadnan concerni mester a haci caba, y esey ta para e operacion ilegal di un hotel bao nanishi di tur hende. Pa nan suerte entre nan tin varios persona cu ta cay den e categoria “niet zomaar iemand”, loke ta yuda aumenta e presion riba gobierno ( y no riba e hues).

Remarcabel ta cu den e corant Amigoe di Aruba di diabierna 11 di december, presidente di Parlamento, un di e integrantenan prominente di Preserva Malmok, a declara cu “e caso aki ta importante pa tur ciudadano di Aruba cu tin molester di practica y actividad ilegal di construccion sin permiso, cu ta ser tolera (“oogluikend toegelaten”) pa gobierno dor di no actua.” Awor nos no sa si tempo e presidente mes tabata ministro encarga cu cartera di Infrastructura y Desaroyo Teritorial e practicanan ey tabata existi tambe, un pregunta interesante cu probablemente e lo no tin pura pa contesta. Pero e actuacion di gobierno ta pio cu loke Sra. Lopez – Tromp ta bisa!

Pasobra awor pa colmo por lesa den e sentencia provisional cu gobierno tabata contra e medida cu e habitantenan a pidi hues. Es decir cu, despues cu gobierno a manda carta pa prohibi e construccion sigui, na momento cu tur trabao a caba, pues su prohibicion no tin ningun consecuencia, awor gobierno ta contra pa para e operacion, mientras cu no tin permiso pa opera! Kiermen gobierno probablemente lo kier duna nan e permiso tambe pa opera e hotel na e logra ey toch! Por ta cu e compania a haya un ‘toezegging’ caba cu nan ta bay haya e permiso?

Esaki ta lanta e pregunta unda e gobierno aki ta para den henter e tema di ordenamento teritorial. Algun tempo pasa caba den e seccion aki nos a dedica atencion na e situacion unda cu gobierno, inboluntariamente of a proposito, no ta percurando pa un debido implementacion di e ley di Ordenamento Teritorial, cu e propio ex ministro Lopez Tromp a pone den implementacion tempo cu e tabata pertenece na otro partido y otro gobierno. E impresion ta cu henter e asunto aki ta hole manera un maniobra pa cuminsa kibra e maneho cu tabata existi te awor di mantene Malmok como area residencial. Si gobierno duna Zissu Properties e permiso, a pesar di tur e protestanan awor, esey ta habri porta pa converti henter Malmok gradualmente den ‘boutique hotels’, segun e inversionistanan logra cumpra propiedad den e area. Ta p’esey gobierno ta nenga di haci su trabao?

LEAVE A REPLY

Please enter your comment!
Please enter your name here