Minister di Deporte y Enseñansa, Endy Croes, a tene un conferencia di prensa ayera mainta den anticipacion di e apertura di Weganan Escolar 2023 cu ta bay tuma luga awe tardi na Stadion Frans Figaroa.
Pa e gran apertura aki, Minister a indica, ta bay tin mas di 1000 alumno y 45 scol, 12 scol preparatorio, 23 scol basico y 10 scol secundario, cu lo ta participando den Weganan Escolar 2023. Tin shete diferente disciplina den e Weganan Escolar, basketball, futbol, volleyball, beach tennis, badminton, functional fitness y baile cultural.
William Erasmus di IBISA a splica cu manera ta conoci e programa di Weganan Escolar a cuminsa desde e inicio di aña escolar 2022-2023. Durante henter periodo di Weganan Escolar, Erasmus a indica, tin alrededor di 4500 mucha cu a participa. Tin algun deporte cu weganan di clasificacion ta tuma luga desde cu scol a habri y aworaki a yega e momento pa tur e weganan final tuma luga.
Erasmus a indica cu ta bay tin diferente premio atractivo, entre otro premionan cash, MVP di aña pa deportenan cu ta bay tuma luga den final, scol di aña y plakkaat pa e docentenan cu ta stimula e muchanan pa participa den deporte.
Durante e conferencia Minister Croes a remarca e nificacion di e mascota cu ta representa Weganan Escolar 2023, e parha Wiwi.
E mascota aki su storia ta enfatisa e importancia di haci deporte y come saludabel, un punto cu tanto Ministerio di Deporte como IBISA ta enfoca hopi riba dje pa e mucha- y hobennan na Aruba.
Pa loke ta e apertura oficial cu ta tuma luga awe na Stadion Frans Figaroa, Minister Croes a menciona cu e desfile oficial ta cuminsa pa 6:30 di atardi y e apertura ta bay consisti di un show cultural bao encargo di Mariol Peña unda cu ta bay tin 80 mucha di scol presentando durante e show y ta bay tin acto protocolario tambe durante e apertura.
El a agrega cu e antorcha olimpico ta ser carga pa e rumannan deportista Jansen, cu lo drenta stadion Frans Figaroa pa asina cende e candela olimpico cu lo keda siman pa dos siman largo. Na final di e apertura e Weganan Escolar 2023 ta declara habri oficialmente, ta scop e prome bala y un wega di futbol ta tuma luga. Despues cu e wega caba ta bay tin entretenimento den man di Tsunami.
Por ultimo Minister Croes a extende invitacion na pueblo di Aruba pa asisti na e gran apertura di Weganan Escolar 2023 y demostra nan apoyo y sosten pa e proyecto aki cu ta na bienestar di e mucha- y hobennan di Aruba.
