Minister di Finanzas y Cultura, Xiomara Maduro hunto cu director di Departamento di Impuesto, Luenne Gomez-Pieters y director di departamento di Aduana, Roderick Croes a tene un conferencia di prensa basta extenso ayera mainta pa informa comunidad tocante e impuesto di BBO na frontera.

Ora a trata presupuesto pa e aña aki, nan a indica cu Aruba ta bay conoce e cobransa di un BBO na un manera mas adelanta na e momento cu ta importa e producto. Den esaki, ta hopi pregunta tin den comunidad tocante e topico aki, como ehemplo, con e sistema ta bay traha.

Diferente seccion informativo a tuma luga na Departamento di Impuesto conhuntamente cu Departamento di Aduana pa asina tur esnan envolvi den e area aki por cuminsa haya informacion. Maduro a indica cu e ley a cuminsa cana su caminda pa asina por ricibi su consehonan di Raad van Advies, na unda tambe a cuminsa traha riba e contesta pa e ley por sali pa Parlamento di Aruba.

Na cuminsamento, nan a señala cu e ley aki mester bin na vigor na mita di aña, pero debi na e tardansa pa e trahamento di e ley, awor e ta premira pa keda implementa dia 1 di juli.

Director di Departamento di Impuesto, Luenne Gomez-Pieters a bisa cu nan a reuni cu diferente stakeholders caminda cu departamento di Impuesto hunto cu esun di Aduana a duna un informacion detaya di pakico un BBO lo bay funciona.

A indica cu for di 2007 ta bin trahando cu un sistema di BBO cual ta un sistema relativamente simpel, cu ta acumulativo y esey ta un di e desafionan di e sistema. “No tin niun sistema di impuesto indirecto cu ta fout of ta bon, ta un escogencia cu paisnan ta haci pa introduci un sistema di impuesto indirecto y tempo aya a scoge pa un sistema simpel, manera esun cu nos conoce caba desde 2007,” el a bisa.

BBO ta cobra di empresario, na unda e ta paga esaki mas e otro impuestonan como BAVP y BAZV riba e volumen di benta di producto y servicio di su negoshi, loke ta trece cune un estimulo fiscal pa importa productonan directamente di afo. “Esaki ta algo cu comercio a menciona na momentonan cu a subi e tasanan di impuesto di 4% y 5% pa 6%.”

E sistema di BBO tin un caracter acumulativo na momento cu tin mas cu un “schakel”, ora producto y servicio ta keda transmiti pa yega na e consumido, ta cobra BBO/BAZV/BAVP na cada schakel, incluso e impuesto cobra den schakel anterior. Finalmente e consumido na Aruba ta confronta cu un producto cu ademas di impuesto riba importacion y accijns tin acumulacion di BBO,BAZV y BAVP.

Loke introduccion di BBO na frontera ta bay trece cune, nan ta mira cu e motibo di importacion di producto mester ta primordialmente basa riba motibonan comercial y no riba estimulo fiscal, manera ta e caso actualmente. Esaki ta algo cu comercio mes tambe ta señala como un disturbio den mercado y tambe pa elimina e estimulo fiscal pa importa productonan directamente di afo, ta deseabel pa cuminsa cobra BBO/BAZV/BAVP riba importacion di producto entrante 1 di juli 2023.

Segun Gomez-Pieters, e cambio aki tin como meta pa proteha e mercado local y pa reduci e efectonan desfaborabel di economia informal manera falta di cumplimento cu pago di BBO/BAZV/BAVP y evasion fiscal. Esaki ta bay den man cu e derecho di recuperacion di BBO/BAZV/BAVP cu a paga caba na momento di importacion di mercancianan comercial.

E cobransa di BBO/BAZV/BAVP na frontera, manera el a sigura, no ta bay tin como consecuencia un costo adicional pa supermercadonan cu ta bende productonan di consumi, industria di benta di paña, articulonan di cas, construccion, herment, palo, piedra, cement, etc., mirando cu e BBO/BAZV/BAVP ta bay ta un pago adelanta compara cu e situacion actual caminda su cobransa ta bay sosode na final.

E pago di BBO/BAZV/BAVP na frontera ta conoce un derecho di deduccion pa tur producto comercial cu ta destina pa e rebenta (handelsgoederen). E derecho di deduccion ta conta solamente pa empresarionan pa BBO/BAZV/BAVP na Departamento di Impuesto.

Den e parti aki, Gomez-Pieters ta sigura cu nan ta atende cu e parti di incumplimento, cu tin comerciantenan cu no ta declara BBO of no ta registra y si lo mester paga e BBO na frontera.

Como ehemplo, el a señala cu:

Importacion di productonan comercial den luna di augustus 2023 na un balor di 10.000 florin

BBO na frontera = 7.000 florin (7% x 10.000) paso 1.

Volumen di benta den luna di augustus 2023 = 20.000 florin

BBO na DIMP = 700 florin (7% x 20.000 = 1.400-700) paso 2.

BBO total = 1.400 -> e suma aki ta igual si no tabata tin e cobransa di BBO na frontera, pues e peso di impuesto no ta subi.

Na ningun momento tin peso adicional di impuesto riba un extra-schakel, e ta bay keda un schakel di 7% riba 20.000 florin (volumen di benta), di cual un parti (700 florin) ta paga adelanta na frontera. No ta bay tin peso adicional di impuesto di 14% di BBO/BAZV/BAVP, pues no tin ni un motibo fiscal pa aumenta prijs di productonan comercial. E reconciliacion di e pago di BBO/BAZV/BAVP na frontera ta tuma luga den e luna concerni.

Pa e pago di impuesto aki cu ta sucede na frontera, e contribuyente no mester bay mantene un administracion cu papel pa despues na final, ora e ta entrega su declaracion di BBO, e tin cu sinta saca cuenta pa wak kico el a paga na frontera. E informacion di e contribuyente di e BBO ta bay automaticamente den e sistema di ASYCUDA di e departamento di Aduana pa e sistema di departamento di Impuesto.

Tambe ta bin dilanti e pregunta kico ta pasa si acaso e benta no ta mas halto cu loke e comerciante a importa? Si e volumen di benta ta por ehemplo 5.000 florin, menos di loke e ta e balor di importacion, esey kiermen cu e comerciante lo paga 350 florin over e volumen di benta. Pero manera e ehemplo ariba ta indica, el a paga 700 florin, kiermen el a paga di mas. Na e momento ey automaticamente e 700 florin cu el a paga na frontera ta keda deduci di e 350 florin y e tin derecho riba un restitucion di 350 florin.

Esaki ta un proceso automatico cu ta bay ta den un sistema digital y e contribuyente lo bay haya segun e secuencia di nan pagonan di restitucion prome cu e siguiente luna di declaracion.

Esaki kiermen cu empresarionan cu ta importa y ta despues reclama e reduccion di BBO/BAZV/BAVP ta e mesun persona y por haci uso di e mesun number di identidad personal (persoonsnummer) cu ta haci e control pa departamento di Impuesto y departamento di Aduana uno mas facil.

Di e forma aki, e sistema actual di impuesto indirecto di BBO/BAZV/BAVP ta haya un caracter mas hibrido y ta atende cu disturbio actual di mercado local y falta di cumplimento.

Debi cu ta un topico basta extenso, Bon Dia Aruba ta bay publica un otro relato mas tocante e BBO na frontera na e parti di Aduana den e edicion di mañan diasabra 27 di mei 2023.