Green Corridor y Watty Vos Boulevard tin hopi beneficio pa nos pueblo

Parlamentario Donny Rasmijn (AVP)

Proyecto Green Corridor ta andando y esun di Watty Vos Boulevard a caba di cuminsa. Tur dos proyecto ta wordo realisa door di e sistema di Private Public Partnership (PPP), unda cu un grupo di inversionista, cu ta consisti di institutonan local y internacional, ta completa e proyecto y lo keda mantene pa entre 18 pa 20 aña largo. Gobierno lo paga e inversion aki cada aña te ora cu e duracion di e contracto termina. Durante di e añanan cu Gobierno ta paga, e grupo ta paga pa mantene e proyecto. Na final di 18 pa 20 aña cu Gobierno a paga y e compania a mantene e careteranan, e proyecto ta wordo entrega na Gobierno. Pa hopi decadanan Gobiernonan di Aruba tabata kibra cabes con pa realisa e proyectonan aki cu ta rekeri inversionnan cuantioso cu pais Aruba no por carga den un solo tiro.

“Danki na e sistema PPP, cu ta wordo implementa den paisnan grandi manera Merca y Europa, e proyectonan aki por tuma luga”, Rasmijn ta bisa. Pues e sistema PPP ta duna pais Aruba e oportunidad pa logra proyectonan grandi sin cu mester bay haci gasto grandi pa ehecut’e. Ademas di e parti financiero y factibilidad, e careteranan aki lo trece diferente beneficio pa e consumidor directamente. Por ehempel un auto ta gasta hopi mas gasolin ora e mester para cada rato den trafico cu ora e por core mas liber riba caminda. “P’esey ora nos bay wak specificacion riba cuanto gasolin un auto ta gasta, nos ta hay’e pa ora bo ta core den ciudad y ora bo ta core riba caretera. E diferencia por ta 31% si nos ta papia di un auto economico y cu ta uza gasolin como combustibel. Kiermen cu bo gasto mensual pa gasolin por baha cu por lo menos 31% bo no mester para asina hopi manera antes riba caminda”, Donny ta splica. Si por ehempel cada auto uza 25 florin menos di gasolin pa luna, Aruba por spaar 15 miyon florin pa aña na gasolin.

“E placa aki lo draai den nos economia enbes cu e ta wordo manda afo pa paga gasolin”.

Como cu Aruba lo uza menos gasolin, contaminacion di nos aire tambe lo baha considerablemente. Esaki ta sin conta fuel di e trekkernan, taxi, bus etc. cu tambe lo bay traha mas eficiente y lo scapa oranan di trabou pa gana e mesun placa. Cada automobilista lo por sali mas laat for di cas, pasando mas tempo cu famia, y wordo exponi na menos stress di trafico. Un careda dobel via ta mas sigur y menos accidente di auto lo tuma luga locual cu logicamente lo evita dolor emocional y gasto. Companianan di seguronan di auto tambe lo beneficia y bira mas competitivo ora cu menos accidente di trafico tuma luga. Riba un caretera di dobel via e autonan RHD lo por pasa un otro auto sin tin problema di visibilidad manera riba uno di un via unda cu e autonan ta bin di direccion contrario. “Asina nos por keda menciona mas beneficio cu e proyectonan aki ta trece pa nos pais. En general, nos por conclui cu e Green Corridor y Watty Vos Boulevard tin hopi beneficio pa nos pueblo!”, Sr. Rasmijn ta termina.

You May Also Like

Ley di onderwijsfonds a yega Parlamento di Aruba

E Landsverordening cu ta reglamenta e presupuesto di fondonan di enseñansa (onderwijsfonds) a yega ...

‘E postema a scheur, detencionnan a cuminsa cay’

Parlamentario mr. Juan E. Thijsen ta siguiendo e desaroyonan gubernamental, constitucional y politico di ...

Alan Howell (POR): Ta pidi atencion di gobierno pa ex EPB dependance San Nicolas

ORANJESTAD- Parlamentario di POR, Alan Howell a indica den tono preocupa cu habitantenan cu ...

Curtis Fraser (POR): Danki pa Acepta mi

Tin momentonan den bida unda bo ta realisa cu di berdad tur cos ta ...