Debi na costo di bida halto, na unda cu prijsnan di combustibel a subi un biaha mas igualmente cuminda cu tambe ta subi constantemente, un grupo di ciudadano preocupa pa e situacion financiero y economico di e isla a convoca un rueda di prensa ayera mainta pa asina trece dilanti nan mal contento.

Adri de Palm a comenta cu nan ta hopi preocupa pa e situacion cu ciudadanonan na Aruba ta bibando actualmente, “dia pa dia nos problemanan ta birando grandi y mas grandi” el a sigura, ademas a declara cu di parti di gobierno nan no ta mira ningun solucion pa cu esaki.

Ademas, el a bisa cu nan a convoca e medionan di comunicacion pa duna nan declaracion dilanti un pompstation pa motibo cu a yega momento cu gasolin ta asina caro cu el a bira impagabel pa lo cual nan tin cu bay eherce nan trabao di tur dia cune. Tarifanan di taxista mester aumenta, prijs di autobus tambe ta bay aumenta. “Asina cu bo mishi cu gasolin, bo ta mishi cu delaster un cos riba Aruba”, Palm a menciona.

Igualmente el a trece dilanti cu tambe ta subi e otro combustible, na aña 2008 gobierno di MEP mes a retene e cen riba gasolin caminda pa 10 aña te cu 2018 ni un gobierno a mishi cu e fondo aki, “MEP a yega na mando y a sinta na e gobierno actual y nan a pone back y nan a redobla e BVO” segun Palm a sigui comenta ainda cu tur e aumento cu ta bin cada dia e ciudadanonan ta haya sorpresa di bida.

“A yega un momento pa pone un paro na e cos aki pasobra pueblo no por mas y no ta soporta mas”, el a expresa.

Den un aña di tempo gasolin a subi 11 biaha, na unda nan ta pidi pa e gobierno aki tene consideracion cu pueblo pa busca un solucion otro caminda y no busk’e riba lomba di pueblo pa motibo cu no por hala rosea mas, tambe el a indica cu nan ta riparando cu den dianan aki tin hopi turbulencia riba Aruba, “si gobierno kier baha gasto cuminsa den Cocolishi mi shon, cu tur e coordinadonan cu ta core den auto cu nan gasolin den dje, ta e pueblo ta paga pa nan” Palm a agrega.

Ta p’esey el a trece dilanti cu a yega ora pa pueblo lanta pa su derechonan y cu aworaki ta drentando december na unda cu gobierno no a puntra cuanto hende tin pan riba nan mesa ni cuanto hende tin coriente na nan cas y cu e pueblo aki cada dia ta bayendo cada mas den decadencia.

“Pueblo aporta boso mes na cualkier accion cu ta bay tin aki na Aruba den dianan aki pasobra december mi kier sa nos no ta bay tin ni Pasco ni Aña Nobo pasobra e luga aki ta bay ta bruha”, Palm a menciona.

Di su parti, Pierre Lacle cu ta traha como taxista a señala cu nan cu ta esunnan cu ta core dia pa dia riba caminda y nan ta a sinti cu e costo a bira dobel pa nan cu nan tarifa ta vast, el a sigura cu e situacion mas posibel ta cu gasolin lo bolbe subi na december y na januari, “gasolin a subi y nos entrada ta keda mesun cos, un situacion cu nos no por carg’e mas”.

Pa e motibo aki, el a pidi pa coleganan di taxi coleganan di autobus cu nan no por sigui absorbe e parti, “mas y mas hende ta drenta den gobierno y esey kiermen pa gobierno tin mas placa pa e saca na unda e ta ranca for di nos cartera” Lacle a expresa.

Un otro persona cu a uni na e declaracionnan aki como otro ciudadano preocupa pero no a identifica a bisa cu gobierno tin cu cuminsa respeta e comunidad y stop di bisa cu nan ta wordo manipula door di cierto personanan pa motibo cu awendia tin hopi medio di comunicacion na unda tur persona ta wordo educa y tin hopi manera pa hende haya informacion, “nos no ta un pueblo bobo, nos ta pidi respet pa esaki pasobra nos tur tin cu bay lucha tanten cu boso ta yena Bestuurskantoor y nos tin cu busca manera pa yega na nos gastonan na cas”, el a afirma.

Tocante e manifestacion cu a wordo convoca pa awe den oranan di atardi door di e yamada di sindicatonan y diferente organisacionnan cu a uni na esaki, nan a menciona cu sigur nan lo uni na esaki pa motibo cu no ta di awe cu sindicatonan ta bringando pa nan derecho y manera el a sigura “ainda nan no por hay’e” Palm a finalisa.

 

LEAVE A REPLY

Please enter your comment!
Please enter your name here