Miembronan di diferente sindicato, trahadonan di diferente companianan tanto publico, semi-publico como priva a asisti na e reunion extraordinario tocante recorte salarial di 12.6% tot nader order.
Durante e reunion aki, nan a trece dilanti cu ta basta di entrega sin claridad. “Trahadonan a wordo falta respet na unda no a duna derecho pa papia, nan no a wordo scucha ni duna nan opinion” manera Magaly Brito, presidente di sindicato Seppa a expresa.
Nan a anuncia cu awe lo entrega un carta den cual ta inclui nan exigencianan, entre esakinan, elimina e reduccion di 12.6% riba salario.
Ademas como Simar nan tambe ta considera cu recorte den Enseñansa di 11 miyon ta un abuso. Ta p’esey cu awe nan lo haci un manifestacion for di 3or di atardi for di Juliana School conhuntamente cu otro sindicatonan.
“Respeta mi salario y duna e mucha loke e merece” ta e slogan di awe den manifestacion, segun loke Josephine Albertus presidente di sindicato Simar a expresa den reunion aki.
