Plan di e ministerio aki tambe ta un documento extenso, di cual aki Bon Dia Aruba ta duna un resumen. Pa e detayenan nos ta referi na e documento di Gobierno di Aruba.

Vision economico

Colaboracion entre partner lo ta e conexion di vision pa haya resultado. Sector publico y priva hunto a produci serie di documento cu solucionnan strategico y awor den e periodo di gobernacion aki ta enfoca riba implementacion.

Enfoque ta riba desaroyo economico sostenible hunto cu e Sustainable Development Goals (SDG), e “six promising sectors” innovativo y tambe riba e principionan di economia circular.

Cu desaroyo sostenible y circular como punto di salida, lo traha pa un mihor presente y futuro.

E desaroyo economico mester bay conhuntamente cu mehoracion di calidad di bida di ciudadanonan y proteccion di naturalesa. Coordinacion entre e diferente areanan di maneho y alavez colaboracion fuerte na nivel nacional y internacional, lo ta esencial. Aruba mester aloca e recursonan financiero y personal limita na maneho nacional di prioridad. Pa esaki decision basa riba dato confiable (“evidence-based policy making”), coherencia den maneho, monitoreo, evaluacion y contabilidad ta crucial pa gobierno implementa maneho cu impacto.

Gobierno, sector priva, campo social y enseñanza superior mester traha hunto pa implementa e 17 metanan di desaroyo sostenible (SDG) y e ministerio hunto cu partnernan, lo enfoca riba crea condicionnan pa stimula actividad pa avanza desaroyo sostenible y circular, pa logra transicion pa esaki.

Un clima dinamico pa empresa y diversificacion di economia

Maneho di permiso pa negoshi: Lo stimula un clima empresarial dinamico y lo explora y crea incentivo pa diversifica economia. Lo modernisa leynan existente pa stimula oportunidadnan empresarial, mehora facilidad y alivia costonan pa haci negoshi. Ambicion ta pa reemplaza e procedura di peticion pa (mayoria di) negoshi pa un proceso di otorgamento di permiso di negoshi integral, eficiente, dinamico y digital, centralisando full e procedura bao di ministerio di Asunto Economico. Lo investiga e aspectonan huridico, practico y financiero, pa evalua si un proceso completamente centralisa ta factible.

Lo amplia metodonan di pago, pa stimula e-commerce y negoshi local enfoca riba Exportacion haciendo transaccion local y internacional mas eficiente, entre otro via posible introduccion di sistemanan di pago manera `Paypal’.

Compliance y proceso di cuenta bancario: mehora e posicion di competencia di Aruba reduciendo peso administrativo y financiero di sector priva, revisa e regulacion di ‘compliance’ existente pa evalua si por flexibilisa esaki. Tambe evalua con por agilisa proceso pa habri cuenta bancario, den colaboracion cu Banco Central, Asociacion di Banconan y otronan.

Entrepreneurship: stimula un clima empresarial dinamico sondeando e posibilidadnan di subsidio, strategic partnerships, etc. pa negoshinan innovativo, y organisa seminarionan, curso, etc. pa comerciante, stimula talento empresarial nobo y stimula crecemento di e-commerce.

Gasto pa haci negoshi: sondea strategianan pa baha gasto di haci negoshi.

Introduci incentivo (fiscal) pa stimula e ‘six promising sectors’ hunto cu ministro di Finanzas y Cultura.

Stimula acceso na mercado local di capital: posibilidadnan cu inversionistanan local y no institucional por participa riba e mercado di capital local.

Cannabis medicinal como industria nobo: contribucion na diversifacion di economia, cu atencion na e agricultor local, cu atencion pa tecnica y maquinaria di agricultura eficiente y moderno, e financiamento, e proceso, e operacion di negoshi, logistica y benta, preferiblemente na un forma centralisa.

Revitaliza San Nicolas como centro creativo: lo revitalisa San Nicolas como centro di industria creativo cu actividadnan cultural y creativo, basa tambe riba e National Transformation Map. San Nicolas lo haya cualificacion como ‘Creative City’ y alavez ‘Tree City San Nicolas’.

Revitaliza centro di Oranjestad: como centro moderno cu actividadnan empresarial y gubermental.

Hunto cu sector priva lo identifica algun proyecto strategico pa trece hende back den centro pa entre otro trabao, como cliente potencial pa empresa nobo, manera F&B. Enfoca riba un business centre den centro pa ubica tur departamento di gobierno relaciona cu economia, cu espacio pa incubators, y actividad di estimulo. Oranjestad lo converti den un centro vibrante, cu

servicionan empresarial y gubernamental, di vivienda y recreacion cu cualificacion como ‘City of Gastronomy’ y tambe ‘Tree City Oranjestad’.

Cooperacion economico internacional: Aruba lo sigui enfoca pa mantene y reforza Partnershipnan economico existente. Atencion special pa relacion economico cu paisnan den region (p.e. Colombia, Republica Dominicana, Panama y Caribe Hulandes). Pa mehora comercio den region lo purba yega na tratadonan pa evita ‘double taxation’. Pa stimula comercio entre e islanan di Caribe di Reino lo explora e posibilidad pa introduci un union duanero comun.

Strategia pa reduci importacion: reduci dependencia di importacion cu produccion di agricultura;

identifica, revisa y selecta proyectonan di inversion innovativo y individual pa sostene sector primario. Esencial ta e aplicacion di innovacion den metodonan di produccion, acceso na financiamento y expansion di mercadonan di benta.

Modernisa zona liber: lo traha hunto cu Freezone Aruba pa crea un puerto logistico di distribucion di producto, unda cooperacion estrecho cu Freezone, aeropuerto, waf y douane ta esencial. Sondea implementacion cu enfoque riba e ‘six promising sectors’ logrando diversificacion economico.

Un clima dinamico pa empresa y diversificacion di economia ta contribui na crecemento economico y posibilidadnan di empleo (SDG goal 8), innovacion (SDG goal 9), bario y comunidad sostenible (SDG Goal 11), seguridad di cuminda (SDG goal 2), accion riba clima (SDG goal 13) y efectividad di servicionan publico (SDG goal 16).

Competencia y Consumidor.

Lo intensiva informacion na consumidor riba derechonan y sondea manera efectivo pa efectua proteccion legal di consumidor.

Competencia: lo instala e autoridad di mercado y consumidor. E autoridad aki lo concentra riba cumplimento di e convenionan di competencia, posicion den mercado, monitor concentracion di companianan y formacion di kartel. Despues lo expande cu entre otro e ley di consumidor, maneho di energia y maneho di telecomunicacion. E empresanan estatal cu ta suministra servicionan di interes economico general tambe ta cay bao di e monitoreo di e autoridad di competencia.

E-commerce y centro di distribucion internacional

Desaroya E-commerce: cambio den ‘core business’ di Post Aruba N.V., di entrega post tradicional pa entrega di paki via post (comercio electronico). Post Aruba N.V. ta premira cu e demanda di comercio electronico lo sigui crece den e añanan venidero, tambe den e area di post internacional. Lo sondea factibilidad di un expansion mas amplio of converti servicio tradicional di Post Aruba N.V. den servicio relaciona na comercio electronico.

Establece un centro di distribucion: Aruba geograficamente ta situa na un lugar unico, cu su waf cu ta ideal pa e centro di distribucion tin un aspecto postal. Lo investiga si e plan aki ta realisable pa Aruba.

Comunicacion, tecnologia y innovacion

Leynan di comunicacion y media: den cuadro di digitalisacion di sociedad ta necesario pa actualisa leynan existente.

Ley `Telegraaf- en telefoonverordening’ di mas di 100 aña mester keda reemplaza pa ley nobo cu ta acapara e digitalisacion actual, cu ta introduci un conseho di medionan pa stimula uso responsable di propaganda y manera di conduci periodismo na Aruba.

Tecnologia y innovacion: uso di technologia y innovacion den sector priva y talentonan nobo empresarial primordial pa desaroyo economico. Aruba su infrastructura di IT mester keda den linea cu desaroyo internacional.

Desaroyo sostenible

Stimula ‘research and development’: stimula empresanan local y internacional pa inverti den energia limpi y tecnologia basa riba principionan di economia ciruclar; tambe stimula empresanan local y internacional pa inverti y enfoca riba research and development pa cu energia di solo, biento y tecnologianan basa riba economia circular.

Aquacultura como industria nobo: pa garantisa y stimula acceso na suministro di cuminda, lo enfoca riba desaroyo di aquacultura como industria nobo conforme exigencianan di calidad duradero. Hunto cu ministerio di Sector Primario lo explora posibilidadnan pa atrae partnernan riba tereno di conocimento y financiamento pa haci aquacultura posible. Igualmente pa industria di ‘deep sea cooling’.

Di vision pa resultado: implementa!

Implementacion lo transforma vision den resultado. Pa logra esaki un plan di implementacion lo enfoca riba ehecucion di prioridadnan anual den cooperacion estrecho cu ministerionan, sector priva, partnernan strategico, stakeholders y mundo academico, pa logra metanan di desaroyo duradero.

LEAVE A REPLY

Please enter your comment!
Please enter your name here