Durante weekend ultimo, administradornan di un pagina popular entre turistanan cu ta frecuenta Aruba, All Things Aruba, a informa cu nan ta stop di permiti aviso pa excursionnan UTV/ATV riba nan pagina.

Mientras cu nos gobernantenan local ta tarda pa tuma accion pa e varios problema ambiental cu tin na Aruba, nos turistanan si ta keda busca solucion. Asina tambe nos ta mira con cantidad di cacho crioyo cu fundacionnan di bienestar animal ta recoge for di caya ta termina biahando na Merca y Hulanda pa adopcion. Cantidad di turista cu ta bin Aruba tambe ta pasa Animal Shelter, unda ta adopta un mascota pa hiba back nan pais. Esaki mientras e unico solucion oficial riba e isla pa cu e animalnan riba caya ta eutanasia. Igualmente, otro grupo di turista regularmente ta bin Aruba cu donacion pa e diferente fundacionnan encarga cu bienestar di animal.

Y awo por nota tambe cu e turistanan mes ta involucra den proteccion di naturalesa di nos isla. Despues cu fundacionnan ambientalista, manera FNPA y Aruba Birdlife Conservation ta bati alarma pa e destruccion cu vehiculonan ATV/UTV ta causa na nos bida salvahe, ainda no tin un maneho cla di proteccion di naturalesa, ni cumplimento adecua di e leynan cu si tin. Sinembargo, administradornan di All Things Aruba a tuma accion y dicidi di stop di fomenta e uso di e vehiculonan aki, alabes descurashando miembronan di e grupo pa participa den e tipo di actividad aki.

“Recientemente nos tabatin mas y mas reserva riba permiti aviso, potret y post tocante e excursionnan dañino y detrimental di UTV/ATV na Aruba cu a continua tuma luga riba e isla”, e administradornan di e grupo riba Facebook a post. “Probablemente ta dibertido pa core nan, pero nos a dicidi cu e daño cu e vehiculonan aki ta causa na naturalesa y paisahe di Aruba ta sobrepasa e felicidad a corto plaso di core e mashinnan aki.”

Nan a destaca e ‘problemanan diario regardando contaminacion di zonido, contaminacion di aire, y contaminacion di stof y cierto leynan cu ta wordo viola’, probablemente referiendo na leynan di trafico como tambe e prohibicion di core vehiculo di motor riba duinen.

Tambe a haci referencia na e postnan di Aruba Birdlife Conservation, un grupo cu regularmente riba su pagina di Facebook ta post e daño cu e vehiculonan ATV/UTV ta causa na parhanan. “Animalnan chikito (incluyendo e shoco di Aruba y turtuga marino) ta perdiendo nan habitat (y nan bida) mientras chauffeurnan ta sali for di e caminda cu completo indiferencia pa e bunita flora y fauna di Aruba.”

Den lunanan recien tabatin varios incidente unda turista a resulta herida mientras tabata participa den e tipo di actividad aki, y esaki tambe a hala atencion di e grupo, cu a expresa cu ‘hende tambe ta resultando herida mientras accidente a bira un suceso comun’. “Internet ta yen di storia di hende cu a resulta herida y hasta a muri mientras tabata di vakantie na Aruba.”

Teniendo tur e puntonan aki, David Seltzer, Ken Grille, George Edwards y Katrin Oduber, kende ta e administradornan di e grupo, ‘despues di hopi combersacion y consideracion a dicidi como un grupo pa no sigui permiti e organisacionnan aki pone aviso riba nos pagina, y rechasa tur post, pregunta y potret di nan, pa asina yuda facilita mas control regulatorio di gobierno’. “Pues bayendo dilanti, no ta bay aproba ningun post relaciona cu UTV/ATV den e grupo aki, y ta bay elimina cualkier comentario of pregunta.”

Mirando e desaroyonan aki, maneho di FPNA a comenta: “Maneho di FPNA ta contento di mira cu ta bin mas presion, y awor di turistanan mes, contra e uso descontrola di mashinnan UTV, pasobra nan ta destructivo pa naturalesa. FPNA a manda su rapport pa formador y Prome Minister riba pasonan cu mester tuma contra e destruccion y ta contento cu ta mira cu hasta bishitantenan cu ta stima Aruba ta comparti e preocupacion.”

LEAVE A REPLY

Please enter your comment!
Please enter your name here