Recientemente gobierno di Aruba, hunto cu e otro islanan, a yega na un acuerdo cu Hulanda pa loke ta e contenido di e organismo di Reino cu mester supervisa e desaroyo na e islanan cu mester garantiza nan recuperacion economico efectivo. Y pa ta mihor prepara pa un eventual siguiente golpi cu por bin. Esey den linea general ta e esencia di e acuerdo cu ta trece dilanti. Naturalmente den trasfondo ta hunga un papel importante e hecho cu Hulanda ta interesa pa haya e placa back cu nan a hinca te awor den sosten di e islanan y esey nos ta haya di tende regularmente. “Al fin y al cabo, nos mester duna cuenta na nos parlamento y pueblo ta kico a haci cu nan placa,” ta e expresion regularmente manda den nos direccion. Pero esey realmente no ta e motibo mas importante. Y na Den Haag nan sa bon cla cu e motivacion principal ta cu esaki ta un oportunidad unico pa pone poco orden den e lugar aki, ya cu pa hopi aña nan ta argumenta cu nos politiconan, pero en vano. Awor ta e momento, y nos tur por sa esey.

Ta bisa cu Hulanda a haci algun concesion encuanto respet pa autonomia di e islanan. A yega finalmente un claridad riba e rol di e parlamentonan di e islanan den e proceso, unda riba papel nan no por ser ignora sin mas. E ley di Reino cu ta cana su caminda den sistema parlamentario Hulandes, mester haya aprobacion di e parlamentonan di e islanan tambe. Tambe a aumenta un poco e influencia di e islanan den funcionamento di e organismo di COHO mes, pa loke ta nombramento di e miembronan. Y e islanan a haya mas di bisa den preparacion di e plannan mes. Esey ta bon noticia, principalmente pa esnan cu ta haya cu e asunto tabata demasiado dicta pa Hulanda so. Y cu e acuerdo manera e ta awor ta anticipa cu aprobacion den e diferente parlamentonan lo bay mas facil. En todo caso no ta di spera cu nos haya atrobe e tipo di actitud recalcitrante manera algun aña pasa, unda e lider di fraccion di e partido grandi den gobierno hunto cu e presidente di parlamento a haci nan mes ridiculo, keriendo ‘delete Reino’ for di e ley di supervision financiero di 2015. Nos ta seis aña mas leu y loke nos ta bay haya ta loke tabata spera nos na momento cu a deshaci di e ley di Aruba di supervision. Riba su mes esaki tabata un monster imposible, cu tabata regula derecho y deber di gobierno di Reino.Hunto cu e ley di COHO nos ta haya e supervision financiero Hulandes hinca den otro ley di Reino, practicamente mesun cu e otro dos islanan tin caba. Nos no ta tende mucho tocante esaki, pero finalmente nos politiconan mester a baha cabez y acepta cu, Covid of no, nos tin pa hopi aña mas un supervision Hulandes riba nos cu, si tur cos bay bon, lo impedi locura mayor cu nos finanzas publico.

Ta bon pa nos corda cu henter e ehercicio di supervision cu nos ta aden awor tabata riba mesa grandemente caba ora Covid a bin complica cos mas ainda. Y den loke mester remedia awor ta importante tene na vista cu no ta efecto di Covid ta loke mester remedia. Manera bisa anteriormente, di parti Hulandes tambe sigur, cu ta mal maneho structural a pone nos unda nos tabata na maart aña pasa. Y esaki ta y ta keda e clave den loke mester sucede: un pa un e reformanan necesario riba diferente tereno lo bin dilanti, y si e plannan cu e islanan tin pensa pa e reformanan necesario no ta bay suficientemente leu, lo bin un coreccion di Den Haag, esey ta sigur.

Awor, esnan cu ta mira tur esaki como algo lamentable, unda nos capacidad, di dicidi entre nos con ta goberna y kico ta haci, a keda reduci, ta bira tempo pa nos cuminza pensa riba e cosnan positivo cu e reformanan por trece pa nos como ciudadano. Cu nos politiconan lo keda yora te na porta di cielo cu a corta nan paso, esey no mester ta nos problema. Loke nos mester logra ta cu ta papia cla y directo riba kico ta e mehoracionnan cu por bin. Si tabatin un momento den nos historia cortico como pais unda ta obvio cu nos interes como pueblo no ta core paralelo na interes di hopi di nos representantenan, e momento ey ta awor. Ta pesey ta importante pa exigi claridad riba kico ta pasando awor tambe. Mientras nos ta den un fase interminable di consulta cu tur hende, nos ta haya falta di claridad riba varios tema, cu a lo mejor ta keda dicidi den reunionnan secreto, hiba pa abogadonan ‘di confianza’ di gobierno. Reunionnan importante unda no tin limitacion di autorizacion, pasobra supuestamente un gobierno demisionario ta trata ‘lopende zaken’ so. E peligro mas grandi di e tipo di decision secreto aki ta e refineria y e contrato di LNG pa WEB. Bao di e capa di inactividad por ta sucediendo cos cu nos por bay lamenta despues, ora ta laat caba y nos ta termina pagando ‘los platos rotos’ atrobe. COHO lo por cambia e estilo di goberna aki?

 

LEAVE A REPLY

Please enter your comment!
Please enter your name here