Haiti: Fin di Cuerpo di Mantene Paz di Nacionnan Uni

Cu e fin di presencia di e cuerpo di paz di Nacionnan Uni na Haiti acercando, e hefe di Nacionnan Uni pa derecho humano Michelle Bachelet a conta Conseho di Siguridad siman pasa cu e pais Caribense awor ta para na un crusada “entre mantene paz y desaroyo,” urgiendo tur partido pa continua construi riba progreso realisa, o core riesgo di “di perde tur cos” atrobe.

Mientras e ta sinti estimulo di e compromiso di sociedad civil den promove y proteha derecho humano, hunto cu e victimanan di violacion di derecho humano, Michelle Bachelet a reconoce cu “no tabata posibel pa asumi completamente un papel di monitor y abogacia.”

El a nota cu cierto organisacionnan di sociedad civil ta continua di ta blanco di acto di intimidacion bisando cu esaki mester stop, urgiendo tur esunnan cu un interes den futuro di e pais, “pa traha hunto pa fortifica e sistema di proteccion di derecho humano.”

Segun Bachelet e retorno di Haiti na orden constitucional despues di eleccion presidencial, parlamentario y local na 2017, tabata un logro significante.”

E Alto Comisionado a urgi e Conseho pa provee Haiti cu e “apoyo necesario pa fortifica institucionnan, lucha contra impunidad y promove y proteha derecho humano como fundeshi pa stabilidad y desaroyo.”

Loune Viaud, director ehecutivo di NGO Zanmi Lasante, partner riba tereno di salud na Haiti y recipiente di un award di Ms Magazine como “muhe di aña”, tambe a dirigi palabra na e Conseho.

El a conta di violencia basa riba genero y e falta di acceso di hende muhe na cuido di salud como un di e desafionan mas grandi di e pais pa logra desaroyo, Pidiendo e Conseho pa mira esaki como parti di “ reforsa e relacion entre desaroyo sostenibel y paz y siguridad.”

 

You May Also Like

Mexico: Otro periodista asesina na estado Tabasco

Juan Carlos Huerta, un periodista di radio y television di e estado Mexicano Tabasco, ...

Republica Dominicana: Cinco morto den accidente di bus

E informe di Defensa Civil di La Vega a informa di cinco morto den ...

Merca ta acusa Nicolas Maduro di ‘silencia oposicion’

Embahador di Merca na Nacionnan Uni, Nikki Haley, a opina riba comentarionan cu a ...

Puerto Rico a scoge pa bira un estado di Merca

Diadomingo desde oranan tempran poblacion tabata wardando pa e prome boletin informativo. Puertorriqueñonan cu ...

Huelga di maestro a laga mas di 3 miyon studiante sin haya les na Peru

Huelga di maestro di enseñansa publico na Peru ta un lucha serio entre e ...

Informe a revela: crisis a haci mas di 12 mil Venezolano huy pa Brasil

Crisis economico y social na Venezuela a impulsa mas di 12 mil persona pa ...