Dos ciudadano Frances a ser tira mata na Port-au-Prince, capital di Haiti, durante fin di siman pasa, despues cu nan a yega na e pais riba un vuelo for di Francia, pa adopta un mucha, asina un fuente diplomatico y otronan a conta AFP.

Un funcionario di embahada Frances a confirma cu a asesina e pareha Frances, sin duna mas detaye di e circunstancianan exacto di nan fayecimento.

Di acuerdo cu dos otro fuente, sin embargo, e pareha tabata di region di Ardèche den sureste di Francia y a yega na e pais Caribense pa adopta un mucha. Un di e fuentenan a bisa cu a mata nan den un intento di robo cu a resulta fatal.

Un vocero di gobierno di e departamento di Ardèche a confirma pa AFP cu e pareha tabata di e ciudad di Saint-Martin-d’Ardèche, cu a haya luz berde aña pasa pa adopta nan prome yiu.

Haiti, e pais mas pober di continente America, tabata scenario di protesta violento pa mas di dos luna, stimula pa escasez di combustible cu a crece y bira protesta general contra gobierno di presidente Jovenel Moise.

Di acuerdo cu cifra di Nacionnan Uni, por lo menos 42 persona a perde nan bida den e disturbionan desde mita di luna di september.

Ministerio di asunto exterior di Francia a recomenda bishitante pa ‘pospone nan biahe te proximo aviso’. “Demostracion, acompaña pa blokeo riba cayanan principal y actonan di violencia (tiramento di piedra, tira cu arma…) ta hopi frecuente. Gruponan violento ta activo y ta crea un clima di inseguridad,” e ministerio a adverti luna pasa.

LEAVE A REPLY

Please enter your comment!
Please enter your name here