Mientras mayoria di strea musical ta reprogramando nan fechanan di tour pa 2021, Harry Styles ta tirando bista mas aleu y planeando pa presenta den su propio arena – un den cual e ta poniendo su placa y su ideanan.

Styles ta un di e inversionistanan den un arena nobo pa concierto di 350 miyon libra ($456.6 miyon) na Manchester, Inglatera, yama Co-op Live.

E proyecto, anuncia dialuna, ta pon’e den team cu Oak View Group den locual nan ta spera lo ta e arena di mas grandi den Reino Uni. “Tanten cu tur cos ta bon pa 2023, cu speransa nan lo laga mi presenta eynan. Si mi no a dañ’e ainda”, Styles a bisa cu un sonrisa.

Despues di 10 aña cu e ta tour rond mundo y tocando den stadionnan kibrando record cu One Direction, Styles, di 26 aña di edad, sa kico e lo gusta den un arena, tanto como artista y como expectador. “Na final, mi ta un fanatico di musica”, el a bisa. “Mi ta stima bay show musical, mi ta stima musica en bibo.”

Pa e musiconan, e tambe kier crea bunita memorianan.
Ya caba rechasando un sugerencia pa jacuzzi backstage (‘mal idea’), e ta concentrando riba hacie un lugar special pa toca. “Kico ta bay hacie diferente cu djis tour? Mi kier pa e ta un espacio unda hende ta recorda cu nan a toca y ta anticipa pa toca.”

E ubicacion tambe tabata un atraccion grandi pa Styles. E ta haya e idea di duna un ‘ciudad musica’ manera Manchester un edificio nobo di gran escala pa concierto algo ‘increiblemente emocionante’.

E prome trabao di Styles tabata partido di corant pa un tienda Co-op na Holmes Chapel, Cheshire – entregando corant pa ‘algun libra’ prome cu bay scol – pues traha cu nan awo ta sinti como un momento di circulo completo. (Mayoria di placa cu e tabata gana como partido e tabata gasta riba mangel, el a bisa.)

“Talbes e prome nan lo pone mi entrega corant na cada asiento”, el a bisa como chansa.

Tata di Styles ta biba na Manchester. E ciudad Ingles recientemente a ser poni bao restriccionnan estricto pa gobierno Britanico pa motibo di e cantidad di caso di coronavirus. “Ta temponan dificil. Manchester lo bin back. E lo djis hacie. Manera tur caminda, ta bay pa hende protegiendo otro.”

E pandemia a stop su plannan pa tour den sosten di su album ‘Fine Line’ te cu december proximo. Styles ta keda filosofico tocante e retraso. A move su fechanan pa 2021 y el a bisa cu e ta mas preocupa pa tene su personal y fanaticonan safe.

Na luga di tour e por a usa e tempo aki pa cuminsa actua di nobo den un ‘tremendo proyecto’, e thriller psicologico ‘Dont Worry, Darling’, dirigi pa Olivia Wilde y cu presentacion di Florence Pugh. Ta un cambio for di e musica cu e semper ta trahando riba dje.

“Bo ta purba di pone tanto di bo mes den musica y despues bo ta purba di activamente saca esey di cualkier actuacion”, el a bisa. “Mi ta sinti increiblemente afortuna pa por haci dos cos cu mi ta stima haci.”

Mientras e ta grabando, Styles ta kedando leu di rednan social cu ta monitor e largura di su cabey, na luga lansando un video nobo pa ‘Golden’ filma na Italia. “Ta un di e prome canticanan na momento cu mi tabata trahando e album y semper tabata un fuente di alegria pa mi. Y mi tabata kier haci un video cu ta captura esey. Mi kier pensa cu lo alegra algun hende, talbes. El a alegra ami”, el a bisa sonriendo.

LEAVE A REPLY

Please enter your comment!
Please enter your name here