Diasabra 11 di december Heintje Ras a cumpli 70 dia den mina fosfaat, kibrando asina e Guinness World Record cu tabata anteriormente un record logra pa un grupo di persona cu a pasa 69 dia den un mina.
En conexion cu e logro aki, team di Heintje a organisa un radiothon diasabra pa yuda cu e recaudacion di fondo pa asina logra yega na e meta di e hazaña aki, cual ta e mega museo. Manera ta conoci caba Heintje Ras a drenta e mina di fosfaat na Sero Colorado dia 2 di october 2021 y lo sali for di e mina dia 9 di januari 2022, completando 100 dia den e mina di fosfaat.
Sra. Charlene Marchena, PR y miembro di e team di e gran hazaña di Heintje Ras a comenta na e portal Mas Noticia, cu aunke Heintje ta haciendo e hazaña aki pa logra su record persona di 100 dia den e mina di fosfaat y pa yega na e mega museo, e proceso no ta uno facil.
“E ta un hazaña hopi duro pasobra Heintje no tabata tine fasil. Hende ta wak Heintje ta hari ariba potret etc., pero e no tine facil, e ta hinca den un mina unda cu no tin claridad, no tin aire fresco, tin dianan cu e ta pasa su so, dus e no ta facil. Pero nos mester compronde cu un persona cu tin un proposito, e tin un meta, e tin un soño, si e no a logrele via otro portanan cu por a yudele, e lo bay logra esaki pasobra Heintje ta un persona cu determinacion, cu vision y cu gana pa logra loke e tin den su mente”, el a bisa.
E meta principal di e hazaña di 100 di Hientje Ras ta pa construi un mega museo di antiguedad unda cu e lo por pone den exhibicion tur e artefactonan historico cu el a colecta durante su carera como recolector pa henter pueblo di Aruba y mundo por mira y siña mas di e historia di Aruba.
