(NLTimes) – Tur persona – vacuna of no – mester haci test pa coronavirus prome cu atende eventonan grandi of bay na establecimentonan di catering, segun Outbreak Management Team di Hulanda a bisa den un conseho na gobierno dialuna tardi, NU.nl ta reporta.

Segun OMT, e codigo ‘berde’ pa vacunacion completo riba app CoronaCheck no ta automaticamente retira den evento di un test positivo di coronavirus. Esaki ta nifica cu hende cu tin coronavirus toch por haya acceso na eventonan y sitionan cu ta rekeri un test negativo y asina plama e virus den areanan unda no ta mantene distancia social.

OMT tambe kier pa gobierno investiga di e app CoronaCheck por duna acceso solamente na un evento of establecimento pa dia. No por descarta cu gruponan ta plamando e virus ampliamente door di bay di un sitio na otro, e team di experto a bisa.

Riba dia 26 di juni, a relaha mayoria di medida di lockdown na Hulanda, permitiendo eventonan tuma luga y clubnan nocturno habri atrobe. Den e dos siman despues di esaki, e cantidad di infeccion di coronavirus a aumenta drasticamente. E relahacion pues a keda reverti parcialmente riba dia 9 di juli, resultando den clubnan nocturno mester cera un biaha mas.

Riba dialuna, un miembro di OMT a atribui e aumento di infeccionnan al menos parcialmente na e hecho cu gobierno no a scucha conseho cu testnan di Testing Pa Acceso mester ta valido pa maximo 24 ora. Gobierno a haya esaki legalmente complica y pa e motibo aki a haci resultado negativo di test valido pa 40 ora. “Nos sa di e variante Delta cu si bo ta infecta, bo por bay di ‘ainda no detectabel’ na ‘altamente infeccioso’ dentro di 24 ora”, el a bisa.

Dialuna ultimo, prome minister Mark Rutte a bisa cu e gabinete no ta considerando mas restriccion di lockdown actualmente, pero a agrega cu ‘nos por t’aki cu un storia diferente proximo siman’. E tasa di infeccion a parce di stabilisa, pero e cantidad averahe di casonan nobo diario ainda ta hopi halto na alrededor di 10mil pa dia.

LEAVE A REPLY

Please enter your comment!
Please enter your name here