Absentismo grandi na KPA combina cu falta di personal ta contribui na gasto di overtime

Falta di personal ta motibo principal pakico tin asina hopi gasto di overtime na Cuerpo Policial di Aruba, KPA. Y e fenomeno di polisnan cu ta haya prestamo bancario basa riba nan pago di overtime tambe tin atencion di Mando di Cuerpo Policial. Esaki ta locual Auditoria General di Aruba, ARA a menciona den su rapport “Motibo Aumento Overtime.”

ARA a compila e estudio pa aña 2018 y a enfoca riba tres servicio cu ta Cuerpo Policial di Aruba, KPA, Instituto Coreccional di Aruba, KIA y Cuerpo Especial Arubano, CEA.

Trabao extra ta structural

KPA a indica cu ta luchando ya pa hopi aña caba cu falta di personal ehecutivo, esta polis mes como personal tecnico/administrativo, cu ta civil. Esey a conduci na un aumento structural di gasto di overtime. E falta di personal ta brinda poco espacio pa por compensa e trabao extra cu dianan liber adicional.

E plan di organisacion di 2011 a indica cu e formacion desea di KPA mester ta ekivalente na 772 persona den servicio completo (fulltime-equivalent, fte). Den e 772 fte’s ta inclui 628 posicion di formacion ehecutivo y 144 pa personal civil. ARA a nota cu no por saca afo kico ta e relacion entre e formacion desea y e tareanan mara na esaki.

Na 2018, KPA tabatin 596 fte’s, cu ta hopi mas abao cu e cantidad desea, cu ta motibo principal pa overtime.

KPA a indica cu transferencia di su personal pa otro departamento publico hopi biaha ta sosode sin conseho positivo di KPA. E caida, tin biaha temporal, den personal ta pa motibo di despacho di Minister ta tuma hende di KPA, ‘terbeschikking,’ esta na disposicion y tambe absentismo di duracion largo pa motibo di malesa. Esaki ta contribui mas ainda na falta di personal cu atrobe ta pisa riba e gasto di overtime.

Absentismo

Na 2018, tabatin 2023 caso di absentismo pa motibo di malesa, cu a resulta den 15.482 dia cu hendenan di KPA no tabata na trabao. E ta inclui esnan cu ta malo pa duracion largo. Yama malo por dura un dia of por ta mas largo. Si sali di e totalidad di 596 empleado, e cantidad di absentismo ta di tres caso pa dia y un promedio di 26 dia di absentismo pa trahado di KPA den un aña. Den comparacion, e promedio di yamada pa malesa den sector publico ta 260 y 1434 dia ausente. Pues na KPA e ta siete te 10 biaha e promedio di yamada pa malesa y dianan ausente. ARA no a investiga e motibo di e absentismo pa motibo di malesa, pero ta kere si cu un analisis asina lo por brinda un bista kico ta conduci na un absentismo asina halto.

Maneho di Minister no ta enfoca riba overtime

Banda di e maneho di Minister, KPA mes a tuma medida pa controla overtime. Despacho di Minister di Husticia y Departamento di Recurso Humano, DRH a indica cu ta reuni mensualmente pa logra un reduccion structural di e gasto di personal. Minister di Husticia, representantenan di Direccion di Finanzas y DRH ta participa na e encuentro mensual. Banda di esey, segun despacho di Minister, a tene reunionnan desde principio di 2019 cu e servicionan cu tin mas overtime. Meta ta pa pone riba mapa e motibonan pa yega na solucion. KPA, hunto cu KIA y CEA, cu ta e departamentonan investiga pa ARA tambe ta participa na e reunionnan. Pero e despacho di Minister a mustra cu control di overtime no ta un di e puntonan principal di maneho. Pues no tin medidanan den sentido di instruccion di maneho. Pues e reunionnan regular no ta specificamente riba overtime. Ta avisa e servicionan, incluso KPA, si tin señal cu ta surpasa sumanan basa riba cifranan di Direccion di Finanzas. Esaki no ta sosode por escrito.

E servicionan mes, entre otro KPA no ta manda señal na e Minister cu posiblemente lo surpasa presupuesto pa motibo di overtime. Minister tampoco ta ricibi informacion di hefenan (management) riba overtime. Ta haya datonan si cada kwartaal via Direccion di Finanzas y esakinan ta bay den e presupuesto complementario. Mas cu esey, Ministerio di Husticia no ta haci.

Segun KPA, e falta di personal ta haci cu ta dificil pa tuma medida pa baha overtime. Si mester baha overtime, e tin efecto pa siguridad di Aruba. Locual KPA ta bisa ta cu ta percura cu e reparticion di overtime ta transparente y hustamente reparti entre e polisnan. Pero no tin un descripcion por escrito di e procesonan

DRH

DRH a mustra ARA cu en principio, su papel ta pa conseha Minister riba instrumentonan pa maneha gasto di personal. A contribui na e Plan di Maneho Reduccion Gasto di Personal y a inicia e proyecto piloto ‘Absentismo.’ Pero KPA no ta forma parti di e proyecto piloto aki y no tabatin combersacion cu DRH riba e tema te cu 2018.

Internamente a determina cu oranan di overtime por ta maximo 40 pa luna pa trahado. Ta controla e limite regularmente y ta responsabilisa esakinan den reportahe pa e hefenan.

(Articulo ta continua riba pagina 7)

 

LEAVE A REPLY

Please enter your comment!
Please enter your name here