E cayanan di Aruba ta deteriorando y no ta den miho estado”, asina parlamentario Tevreden a duna di conoce durante tratamento di presupuesto di DOW. Aña 2022 no ta tin presupuesto pa asfalta mucho caretera debi na nos situacion financiero cu ya ta conoci. Pero ta tempo pa nos introduci un miho manera pa mantene, asfalta y construi mas caretera. Tevreden a splica su vision cu den su pensamento ta sostenibel, pagabel, y realisabel pa por asfalta, y mantene caretera na Aruba den bon estado.

E realidad di proyectonan PPP di Gabinete Mike-Eman

Na 2015 Gabinete Eman a introduci e plan pa construi Green Corridor y Watty Vos Boulevard, un idea riba su mes bon, pero cu a trece un peso grandi cu ne riba e presupuesto di Aruba. Un proyecto cu a costa demasiado y cu no ta sostenibel. Ta importante pa para keto un rato con e Public Private Partnership (PPP) a wordo ehecuta pasobra esaki ta un di e gastonan di mas grandi den e presupuesto te cu awor.

Nan a wordo mal presupuesta y e tempo pa ehecuta tawata demasiado corto cu a subi e debe pa nos pais demasiado. Si e gobierno di AVP a laga DOW cu contratistanan local traha Watty Vos Boulevard, Green Corridor, Hospital y e 4 MFA’nan, lo e gastonan tawata mucho menos. E gasto inicial pa construi Watty Vos Boulevard tawata 180 miyon florin pero Aruba mester paga 420 miyon florin den 20 aña. E gasto inicial di Green Corridor ta 130 miyon florin pero debi cu nos mester paga 18 aña, lo costa Aruba 292 miyon florin.

 

Diferente na 1983 ora cu Gabinete Oduber a construi Plan Sasaki, a haci uso di companianan di afo pa diseña e concepto cu a wordo ehecuta pa nos mes hendenan guia pa DOW y mas departamentonan. Un plan cu e presupuesto di Pais Aruba por a carga y cu a cana den Fase, di cual prome Fase a costa 19 miyon. Asina evita di tranca nos finansas publico manera ta e caso di Green Corridor y Watty Vos Boulevard. Dicon e diferencia grandi aki, pasobra e enfasis a keda poni riba contratistanan local. Ta bon pa remarca cu Transparency International ta splica cu mayoria actonan coruptivo ta sosode den dealnan grandi di infrastructura y construccion. Esaki kisas ta e motibo cu awe tin politiconan ta wordo investiga.

Un vision nobo

Segun Tevreden, ta ora awor pa nos pais tin un vision nobo con nos ta bay atende cu caretera y asfalt pa e proximo decadanan nos dilanti, y gobierno tin e tarea pa fiha un vision duradero pa esaki. Den reunion publico nr. 2 durante tratamento di presupuesto di DOW, Tevreden a presenta un parti di loke e ta kere cu e tin di bira e caminda pa cana ta keda na gobierno awor pa sondea e posibilidad.

Aruba ta inverti un pro medio di 9 miyon florin na asfalta camindanan pa aña. Normalmente DOW ta traha un lista di e cayanan cu tin di wordo asfalta y asina cada bes ta bay negosha prijs cu contratistanan. Si gobierno cambia e modelo aki, y cera un PPP na un prijs fiho pa termino largo cu companianan local cu ya caba tin experticio den asfalta caretera, gobierno lo por percura asina pa stabilidad di trabou, continuacion den trabou, evita cu divisas ta bay den exterior, y sigura e mercado laboral pa studiantenan cu ta caba nan estudio den e ramo aki. Sin conta cu e compania local ta paga su belasting y ta haci otro gastonan aki na nos pais. DOW lo tin di vigila e calidad di trabou y garantisa cu e trabounan ta cana segun palabracion. Esaki en corto splica ta e beneficionan cu Tevreden a menciona y lo trece e debate den comisionnan fiho pa sigui elabora ariba e topico aki.

Ta momento awor pa nos evalua pasado djis pa mira kico si a funciona y kico no, pero pa añadi un toke nobo na dje pa asina nos por eleva nos pais na un nivel mas halto, duradero y sostenibel. Nos wowo nan ta dilanti nos cara, ta pa nos por mira den futuro y pone riba mesa nos pensamentonan nobo y debati riba nan pa por sigui desaroya y avansa como pais, parlamentario Tevreden a finalisa bisando.

LEAVE A REPLY

Please enter your comment!
Please enter your name here