Parlamentario Alvin Molina (MEP): Cultura ta trece hende hunto, cultura ta uni un pais

Recien mi a reuni cu sr. Chico Harms y sr. Chris Rasmijn di Fundacion Chico Harms. Durante e encuentro ameno nan a indica cu e fundacion ta hayando fondo door di sponsor di diferente compania priva y subsidio anual di Departamento di Cultura. Lamentablemente e placa no ta yega pa cubri tur e gastonan. E fundacion mes ta organisa eventonan pa recauda fondo. Fundacion Chico Harms ta organisa durante aña diferente eventonan cultural manera Dia di Brazil, Dera Gay, Festival di Dande y ta conta cu 45 boluntario. Hopi hoben ta participa den e organisacion, loke ta importante vooral pa yuda preserva nos cultura. E fundacion a enfatisa cu dia di Brazil ta pa ful e comunidad di Aruba, nan ta compare cu Dia di Seu na Curaçao y dia di Rincon na Boneiro cu a bira celebracionnan cultural hopi grandi.

E aña aki tabata di dies edicion di e Parada Cultural di e dia di Brazil cu ta gosa di un popularidad grandi den comunidad. E prome edicion a conta un total di 250 participante y e aña aki a conta cu 1300 participante. Loke ta apart di dia di Brazil compara cu carnaval, ta cu Dia di Brazil tin musica y trahenan diferente, tradicional di aña 1955. E musica tipico cu ta wordo toca ta seis diferente musica cu ta wals, danza, tumba, caha di orgel, folklore y tambe calipso crioyo. E calipso crioyo ta sin trompet canta na Papiamento. Mi a sugeri pa nan usa e Papiamento original di 1955, paso esey tabata diferente compara cu awor. Pa por haci esaki un ‘extra kick’ den e calipso crioyo.

Na 2017 y 2018 a organisa e Parada Cultural banda di area di hotel, masha hopi turista a participa. E celebracion aki ta tuma luga na augustus/september, un bunita oportunidad pa sigui organise den colaboracion cu ATA y AHATA y haci’e un atraccion turistico pa Aruba. Fundacion Chico Harms ta organisa actividadnan cultural pa nos tur gosa di dje. Sigur gobierno lo por yuda mas door di hisa e subsidio, intermedia, yuda promove e actividad aki tanto pa local como nos bishitantenan. Comercialisa e eventonan, pone tent riba e ruta y yuda busca fondonan internacional pa cu cultura na Europa.