Hoben escritora: ‘Mi kier hiba nomber di Aruba dilanti den industria creativo’

Kenna Hernandez, hoben escritora

Bon Dia a combersa cu hoben Kenna Hernandez kende aña pasa a haya e premio pa e miho pelicula durante Aruba Short Film Festival. E hoben ta haya cu na Aruba e movemento di pelicula y creatividad/arte tin hopi potencial pa crece te ainda, pero tambe cu hopi mas atencion por wordo poni riba hobennan creativo.

E hoben cu actualmente ta trahando tanto den botica como den crea conceptonan pa short films, serienan y skirbiendo buki aña pasa a haya un reconocemento pa e short film Like & Share. Sra. Hernandez ta traha na Botica pero mas y mas e ta haya motivacion pa haci trabou creativo full-time. Esaki aunke cu na Aruba segun e hoben tin un mentalidad cu hopi biaha ta limita trabounan creativo.

Trahando riba diferente proyectonan manera serienan riba television, bukinan di diferente genero e hoben a haya cu gana miho pelicula di parti di hurado y di audiencia tabata un experiencia positivo pero tambe sorprendente. E pelicula cu sra. Hernandez y su team a traha riba dje tabata trata tema di termento na scol, cual segun e hoben ta hopi contemporaneo mirando loke ta pasando den nos pais riba tereno social.

“El a sinti straño si ora nos a gana tanto people’s choice como di banda di hurado, pues nos a realisa cu ta un honor grandi y e ta curasha mi pa sigui traha riba mi interesnan pa tambe hiba nomber di Aruba leu. E ta curasha mi pa sigui.”

Sra. Hernandez ta mira cu tin hopi talento na Aruba cu ainda tin hopi potencial pa crece, pero no ta pone hopi enfasis ni ta motiva hopi den ramonan creativo. “Mi ta wak ainda cu iniciativanan manera e Aruba Short Film Festival ta hopi secreto, no hopi hende ta mir’e. Mi ta kere porta ta pasobra no tin hopi promocion pero tambe cu hopi hende na Aruba no ta custumbra pa bay cosnan asina cultural.”

Mas aleu e hoben ta pensa cu di parti di hende creativo y cierto personanan manera hoben cu ta den e ramo creativo tin hopi interes, pero no tin hopi sosten di otro gruponan den sociedad. “Hopi hende ta pensa cu trabounan creativo ta simplemente un hobby y cu Aruba no por yega hopi leu cu industria creativo pasobra Aruba ta hopi chikito. Pero e propio mentalidad aki ta loke ta chikito, pasobra Aruba por yega leu. E ta lamentabel cu tin hopi talento pero e sosten no t’ey.”

Aunke pa gran parti e mentalidad ainda por wordo cambia segun sra. Hernandez, e ta mira cu mas y mas hobennan ta bayendo den direccion di creatividad, cual ta automaticamente aporta na e visibilidad di e industria creativo.

Proyectonan actual

Pa awo e hoben ta ocupa ta trahando riba 2 short film mas cu e mesun grupo. Ademas tin un obra di teatro cu lo bay wordo presenta den fin di maart. E hoben ta trahando tambe pa hunto cu otro personanan ofrece pa publico clasenan di actuacion. Sra. Hernandez ta contento pa mira cu mas y mas persona ta interesa den actuacion.

Na banda di tur esaki, e hoben ta skirbiendo un buki cu e lo kier produci como un serie di television tambe, pa duna un bista riba bida di inmigrantenan pero tambe local na Aruba.

Serie enfoca riba bida di inmigrante

Aruba, y con e bidanan ta toca otro. Sra. Hernandez lo spera di conta e storia di inmigrantenan recien pero tambe di e personanan cu pa basta tempo ta estableci na Aruba pero pa un of otro motibo tin dificultad cu permisonan. Un di e personanan envolvi cu e proyecto aki Charles Croes a conta con e ta haya interesante pa mira bida di inmigrante despues cu e persona ta caba di traha.

“Un biaha mi a mira dos persona completamente cubri cu paña ta verf un edificio, pero despues di basta tempo ta wak nan mi a realisa cu nan ta hende muhe. Mi a sinti un admiracion y interes pa haya sa kico ta pasa den e hendenan su bida pa nan haci un trabou pisa asina. Hopi biaha nos no ta mira kico tur e dificultad di bida di inmigrante ta encera tras di e cortina.”

E hoben ta spera cu di e manera aki por medio di ficcion por bay conta mas storianan cu ta conecta cu nos bida diario.

You May Also Like

‘Comercio mester ta mas habri pa tuma hendenan cu cierto limitacion’

Ayera na Renaissance Convention Center, e fundacion  cu ta encarga cu cuido na hendenan ...

E charla tocante consentimento por cuminsa mas trempan

No mester warda pa añanan di adolescencia No mester warda pa e añanan di ...

Entrepeneur Arubano ta saca nomber di Aruba na Alemania

Entrepeneur Arubano Phil Hunt ta conta Bon Dia Aruba con e tabata pa cuminsa ...

Aruba no tin manera pa financia seguro medico nacional facilmente

Parlamento, ministernan y pueblo mester dialoga riba cambionan den ley di AZV Seguro nacional ...

Prome Purple Friday den Caribe teni na Colegio Arubano

Ayera tabata e prome Purple Friday cu a yega di tuma luga den henter ...

Mantene balans entre culturanan

“E ironia ta cu awendia mi Papiamento y mi Ingles ta hopi miho cu ...