Jeanella Henriquez ta un hoben Arubiano, actualmente e tin 21 aña. E tin cuatro aña caba bibando na Hulanda y ya caba den su recta final di su carera como Dierenarts assistant.
E hoben tin plannan grandi pa su isla. Den entrevista aki ta conta Bon Dia Aruba un tiki tocante su punto di bista riba sociedad. “Actualmente mi ta studia full time y traha part time na un cafetaria”,e hoben ta subraya. Bon Dia Aruba a puntra e hoben si e ta haya e isla actualmente ta haci suficiente pa hubentud.
E ta bisa cu como tur caminda, Aruba tin su pro y con. “ Mi conoce hopi hoben cu tin nan diploma caba y ta hopi dificil pa nan haya un trabou vast. Si bo tin conexion, bo por haya ayudo lihe, anders niet. Pero con cu bay bin e isla ta ofrece un sistema di educacion cu ta hopi simpel y tur mucha y hoben tin e posibilidad y diferente opcion pa nan yega unda cu nan lo kier yega.” Sociedad materialista Bon Dia a puntra e hoben, kico e lo cambia riba e isla si e tabata por. Pa cual el a contesta “Aruba mester introduci honestidad y tambe integridad bek. Norma y balornan a bay hopi atras.
Decencia y sinceridad a caba. Hende a bira mas materialista y a laga amor pa prohimo, pa patria. Tambe mi ta pensa cu amistad sincero a muri. Fuera di esey tin leynan cu ta hopi bieu cu mester wordo drecha specialmente ora e ta yega na maltrato di mucha y maltrato hubenil. Tur esey mester cambia” Futuro Pa finalisa, e hoben a expresa su plan pa futuro cual mas cu claro ta inclui regresa su isla natal.
“Mi lo kier haci mas pa hubentud di Aruba. Mester bin cu miho plannan pa muchanan por recrea y diberti. Mi lo kier bin bek y brinda apoyo na esunnan mas vulnerabel den sociedad”. E ta comenta.
