(AFP) – Corte a dicta sentencia di cadena perpetua pa un homber Sikh den e asesinato di studiante despues cu polis a boei e victima su man despues di acusacion falso di abuso racial.
Hues na Southampton Crown Court a sentencia Vickrum Digwa, un residente local di 23 aña, na henter bida den prison cu obligacion di pasa por lo menos 21 aña den prison pa e asesinato di studiante di 18 aña, Henry Nowak.
Un hurado diabierna a declara cu Digwa ta culpable den e asesinato riba caya di e studiante di accounting y finanzas december ultimo.
E huicio a haya atencion di varios figura prominente manera activista ultra-derechista Tommy Robinson y fundador di SpaceX Elon Musk, ken a bisa cu esaki ta demostra preferencia di polis.
Oficialnan a aresta y boei Nowak na e escena despues cu Digwa a bisa e ta victima di abuso racial. E victima a fayece debi na su heridanan pronto despues.
Hues a bisa cu e ta “sigur cu Henry no a bisa nada racista.”
Forsa policial a pidi disculpa pa su actonan y a bisa cu el a referi su mes na e oficina independiente cu ta vigila conducta di polis.
E victima su tata, Mark Nowak, a bisa pafo di corte: “Henry no mester a muri riba caya di Southampton den man di polis. E manera cu el a ser trata tabata inhumano y degradante.”
Despues di e veredicto, un grupo ultra-derechista, Turning Point UK a publica imagennan di su lider ta papia na un manifestacion diabierna pafo di stacion di polis na Southampton.
Un grupo ultra-derechista, White Vanguard, a tene un ceremonia chikito na Southampton diadomingo, segun un grupo defensor Stand Up to Racism, cual a tene un contra-protesta.
