CEO di A.T.A., Ronella Croes: Aruba Limpi ta refleha e vision di A.T.A. pa turismo sostenible

E lansamento oficial di e iniciativa Aruba Limpi y e Zona di Desperdicio nobo na Barcadera ta marca mas cu djis e inauguracion di un facilidad nobo di maneho di desperdicio. Segun CEO di Aruba Tourism Authority (A.T.A.), Ronella Croes, e iniciativa ta refleha un vision mas amplio den cual ta usa turismo como un herment pa mehora e calidad di bida di un y tur riba nos isla.

E proyecto, inaugura e siman aki pa gobierno, A.T.A. y Ecotech, ta duna residentenan un lugar unda por deshace di nan desperdicio di manera responsable – y durante e fase inicial aki, gratis. Mientras gobierno a presenta e iniciativa como un solucion practico pa un necesidad di comunidad, Croes a enfatisa cu pa A.T.A., e proyecto ta fit directamente cu e strategia corporativo di e organisacion a largo plaso, y su compromiso cu un maneho sostenible di turismo.

Papiando cu Bon Dia Aruba, Croes a splica cu A.T.A. ta financiando e prome aña di e Zona di Desperdicio, sigurando cu residentenan por usa e facilidad gratis.

“Nos ta haci loke nos por den cuatro di loke nos por,” Croes a bisa. “E placa ey den bo cartera, corda e no ta full dependiente di A.T.A. A.T.A. tin cu sigura cu e placa ta sigui drenta, y cu nos tene cuenta cu e cuatro punto di maneho sostenible di turismo.”

Croes a reconoce cu hopi factor cu ta afecta finanzas di hogarnan ta fuera di control di A.T.A., manera costo di bida, prijs di producto importa, desaroyo geopolitico y politica di gobierno. Pero e ta enfatisa cu no por midi prosperidad solamente den sentido financiero. Croes a bisa cu encuestanan haci pa A.T.A. ta mustra cu mientras placa ta keda importante, residentenan tambe ta balora beneficionan social manera educacion di calidad, seguridad, vivienda pagable, salubridad publico y servicionan confiable.

Pa e motibo aki, e mision di A.T.A. ta extende mas leu cu solamente atrae bishitante y genera actividad economico. Croes a splica cu fundamentalmente, e proposito di A.T.A. ta pa bienestar yega na comunidad di Aruba.

E filosofia aki ta hancra formalmente den e Strategia Corporativo di A.T.A., cu ta pone calidad di bida den centro di maneho di turismo. Vision di e organisacion por keda resumi den un frase: “Aruba como un lugar maraviyoso pa biba ta un lugar maraviyoso pa bishita.”

Segun Croes, Aruba Limpi ta un ehempel practico di con ta traduci e vision aki den accion.

Strategia Corporativo di A.T.A. ta construi riba loke e organisacion ta yama maneho sostenible di turismo. E marco ta basa riba cuatro compromiso: ambiental, social, economico y sostenible. Hunto, e compromisonan aki ta guia e decisionnan di inversion di A.T.A. y su sosten pa diferente proyecto.

E strategia aki tambe ta inclui cinco pilar, di cual un ta enfoca specificamente riba promove comportamento ambientalmente y socialmente responsable, facilita conservacion y regeneracion di medio ambiente, y sostene e preservacion di herencia cultural. E prioridadnan aki ta yuda determina unda A.T.A. ta aloca recurso y cua iniciativanan di comunidad ta ricibi sosten.

Croes a menciona diferente colaboracion y proyecto, manera cu CEDE, Cas di Cultura y Fundacion Chico Harms.

Croes a bisa cu A.T.A. intencionalmente ta busca proyecto cu ta alinea cu asuntonan cu e residentenan mes ta identifica como importante.

El a conta cu basa riba encuesta cu A.T.A. a haci entre e comunidad local, y riba loke nan ta mira ciudadanonan ta expresa, a saca afo cu maneho di desperdicio ta hopi importante – y tambe ta importante pa nos bishitantenan.

“E topico’ki no ta nobo pa A.T.A.,” el a bisa. Croes a mustra cu e autoridad di turismo ta bin invertiendo den iniciativanan ambiental pa añas, maske hopi residente no ta na haltura di e esfuersonan aki.

A.T.A. a inverti den bar’i sushi na beach, a sostene programa pa tene awanan di Aruba limpi, y a inverti den diferente proyecto pa mantene e calidad ambiental di e isla. E organisacion tambe ta financia limpiesa di e santo blanco na e beachnan mas bishita. “A.T.A. tin añas caba cu nos ta inverti den bari sushi na nos playanan, nos a inverti den haci nos awanan limpi, nos ta inverti den diferente hopi otro aspecto. Te hasta e santo blanco riba nos playanan, nos ta hacie limpi den diferente di nos playanan mas bishita. Hopi hende no sa esey.”

E iniciativa Aruba Limpi ta construi riba un fundeshi di proyecto ambiental cu ya tabata andando.

Croes tambe a pone enfasis riba e sosten di A.T.A. pa e programa di Baki den Bario durante november y december di aña pasa. E iniciativa aki a trece oportunidad temporal di colecta di desperdicio directamente den barionan di Aruba y a mustra un participacion fuerte di comunidad.

E respuesta positivo na Baki den Bario a yuda crea momentum pa un solucion mas permanente. Gobierno subsecuentemente a desaroya e concepto di un Zona di Desperdicio permanente, cual finalmente a bira e facilidad inaugura ayera. “Nos a evalua y nos a bisa OK, nos ta yuda pa inicia e proyecto aki,” Croes a splica. Segun Croes, Aruba Limpi no ta djis duna un sitio unda residentenan por trece desperdicio. Intencion ta pa curasha miho practica di maneho di desperdicio, incluyendo separacion di desperdicio y reciclahe.

Residentenan cu kier haci uso di e facilidad ta rekeri pa separa diferente categoria di desperdicio. E iniciativa ta introduci un sistema di color cu ta identifica unda mester deposita cua material.

“Nos ta papiando ‘kinan tambe di reciclahe,” Croes a bisa. “Esey ta algo cu anos ta bin ta haci caba.”

El a nota cu reciclahe ya ta integra den varios programa existente cu sosten di A.T.A. Desperdicio colecta di barinan di sushi na beach ta procesa mediante partnership cu Metabolic Foundation, permitiendo reciclahe di material en bes di djis tira nan afo.

Pa A.T.A., Aruba Limpi ta representa un oportunidad pa familiarisa residentenan cu practicanan responsable di maneho di desperdicio y pa prepara comunidad pa un futuro den cual reciclahe y separacion di desperdicio ta cada bes mas importante.

Como parti di e compromiso aki, A.T.A. a bay di acuerdo pa financia e fase inicial di e proyecto, permitiendo residentenan usa e facilidad gratis den e prome aña. Croes a bisa cu no por specula kico lo pasa despues di e periodo inicial, pero a confirma cu hende cu trece nan desperdicio na e sitio, siete dia pa siman y cu asistencia di personal na e sitio, no ta bay tin cu paga durante e prome aña.

Y e participacion di A.T.A. ta extende mas leu cu financiamento.

Croes a revela cu e autoridad a firma un contract cu Ecotech varios siman atras, despues di un proceso involucrando discusion cu gobierno y evaluacion di operadornan potencial. “A.T.A. a haci e compromiso financiero,” el a bisa.

E partnership ta refleha loke Croes a describi como un evolucion mas amplio den e maneho di e autoridad di turismo. Mientras A.T.A. ta sigui enfoca riba reforsa e producto turistico di Aruba, e autoridad ta evalua inversion di turismo cada bes mas door di e lens di beneficio pa comunidad. “Ora nos papia di mehoracion na nos producto turistico, nos ta tene cuenta cu kico ta importante pa e comunidad y kico ta importante pa nos turismo,” Croes a bisa.

Den su opinion, e dos meta aki no ta mutuamente exclusivo. Un isla mas limpi ta mehora e bida diario di residentenan mientras na mes momento ta mehora e atraccion di Aruba como un destinacion. E conexion aki entre bienestar di comunidad local y experiencia di e bishitante ta un tema recurente den e strategia di A.T.A. a largo plaso.

Aspiracion di A.T.A. bayendo pa 2035 ta centra riba maneho ambiental, enrikecimento social, creacion di balor economico y maneho sostenible ehemplar. E obhetivo final ta pa enrikece e calidad di bida na Aruba mediante maneho responsable y integral di e destinacion.

Aruba Limpi ta alinea directamente cu e metanan aki door di atende un preocupacion practico di comunidad mientras ta curasha responsabilidad ambiental y ta sostene un destinacion mas limpi.

Croes a bisa cu e componente educativo ta bay keda un punto mayor di enfoke bayendo dilanti.

A.T.A. ta sosteniendo esfuersonan di conscientisacion mediante e campaña di Aruba Limpi y canalnan dedica riba rednan social cu ta duna residentenan informacion tecnico tocante categorianan di desperdicio, metodonan di separacion, y practicanan di reciclahe.

“Cada tipo di desperdicio ta bay tin su color, el a splica. “Kiermen nos ta educando comunidad pasobra esaki ta e manera eigenlijk cu nos tin cu sigui bay dilanti como Aruba. Esey ta loke nos tambe ta para p’e.”

Pa Croes, e proyecto na final ta pa crea un cambio duradero den comportamento, mientras ta reforsa e conexion entre turismo y desaroyo di comunidad.
En bes di mira turismo puramente como un motor economico, e strategia di A.T.A. ta posiciona e industria como un mecanismo pa mehora e calidad di bida en general. Aruba Limpi, el a argumenta, ta demostra con por traduci e filosofia aki den un iniciativa concreto cu residentenan por mira y usa den nan bida diario.

Mientras e prome residentenan ta cuminsa haci uso di e Zona di Desperdicio na Barcadera, A.T.A. ta spera cu e proyecto lo contribui no solo na barionan mas limpi y menos dump ilegal, sino tambe na un cultura mas amplio di responsabilidad ambiental.

Pa Croes, e resultado aki lo representa un ehempel exitoso di turismo sostenible den practica.