(AFP)—Un Venezolano ken un agente di inmigracion di Merca a tira y herida na Texas a keda deteni cu bala ainda den su curpa, su abogado a bisa dialuna.
Wilber Rafael Garces Perez, 28, ta den condicion stabil despues di haya un herida di bala den su torso, segun Departamento di Seguridad Nacional di Merca (DHS).
E tiramento na Austin, Texas, diadomingo ta e incidente mas reciente di violencia cu ta envolve agentenan di Immigration and Customs Enforcement (ICE), cu tin como tarea ehecuta e campaña di presidente Donald Trump contra inmigracion.
Abogado di Garces Perez, Kate Lincoln-Goldfinch, a bisa durante un conferencia di prensa cu su cliente a keda transferi for di hospital pa un centro di detencion na Pearsall, rond di 215 kilometer zuidwest di Austin.
“Nan a tir’e aki den su lomba, y nan no a saca e bala, nan no a dun’e remedi pa dolor, y nan a transferie pa ICE, pa un centro di procesamento unda el a pasa e anochi sin cama,” Lincoln-Goldfinch a bisa.
El a bisa cu Garces Perez tabata haciendo un delivery pa DoorDash ora un truck preto sin marca a dal su auto na banda.
“E no tabata sa cu tabata ICE y el a haci un U-turn,” el a bisa. “E truck a persiguie y a bolbe dal su auto na banda, y e agentenan a baha y tir’e den parti patras di su garganta y a sac’e for di e auto.”
“No tin absolutamente ningun hustificacion pa nan tir’e,” el a bisa. “P’esey nos ta pidi pa stop ICE di para auto riba caminda. Agentenan di ICE tin demasiado arma, ta ser paga demasiado, no tin suficiente training y ta violento.”
DHS a bisa riba X cu Garces Perez “a drenta nos pais ilegalmente bou di gobierno Biden y tabatin un orden final pa sac’e for di e pais”.
Pero Lincoln-Goldfinch a sostene cu e tabata na Merca “legalmente cu un permiso di trabou”.
Un altar improvisa cu flor, bela y un borchi cu ta bisa “Husticia pa Wilber” a keda poni cerca di e luga unda e tiramento a pasa.
Trump a haci campaña pa presidencia cu promesa di deporta miyones di migrante indocumenta for di e pais, y a tuma varios medida drastico desde cu el a bolbe Cas Blanco.
Casi 51,000 migrante indocumenta a keda aresta na Merca na augustus, segun cifranan di DHS.
Ruben Ray Martinez, 23, a ser tira pa ICE na maart 2025, den loke Texas Tribune a bisa tabata e prome caso conoci di agentenan di inmigracion matando un Mericano durante e di dos termino di Trump.
Mas recientemente, un Mexicano yama Lorenzo Salgado a muri na juli despues cu un agente di ICE a tir’e na Houston, Texas.
Dos Mericano—Renee Good y Alex Pretti—a ser tira y mata pa agentenan federal di inmigracion den dos incidente separa na Minnesota durante un campaña contra migrantenan indocumenta den e estado mas trempan e aña aki.
