Hospital celebrando hubileo di su empleadonan

Horacio Oduber Hospital

Recientemente Dr. Horacio E. Oduber Hospital a tene nan evento di hubilario pa nan empleadonan y alabes dispidi di algun colega cu ta bay disfruta di nan pensioen. Segun cu e añanan ta bay a ripara cu e evento aki ta bira cada bes mas grandi y aworaki e evento aki ta tuma luga 2 bes pa aña. “Ta mustra cu e ta cay na agrado di e invitadonan cu ta atende e celebracion”, asina miembro di hunta di Directiva di Hospital, sr. Ezzard Cilié, a remarca. Di januari pa juni di e aña aki Hospital tabatin un grupo di 11 persona cu a cumpli 12 aña y mey, 3 persona cu a cumpli 25 aña, 3 cu a cumpli 35 aña y 4 celebrando hasta 40 aña di servicio.

Pa loke ta e pensionadonan e grupo ta consisti di 7 empleado cu ta baha cu pensioen bon mereci. “Mi a purba di ilustra kico e ta nifica pa un hende si e ta dedica 12 aña y mey na un solo doño di trabou. Si bo ta celebra 25 aña, e ta un generacion caba. Si un empleado por tin pasenshi y gusta su trabou, no ta wega pe mantene 25 aña na e mesun di trabou”, Ezzard Cilié a bisa durante su discurso. Sr. Ezzard Cilié a compara antes cu awo y cu hasta tin empleadonan cu a cumpli 40 aña di servicio cu conoce e Hospital bieu y a conoce e ambiente di empleadonan e tempo ey. Nan tabata manera un famia, cada un tabata conoce y busca drechi di otro te cu na 1976 ora cu nan a drenta den e edificio actual.

Esaki tin mas piso y ta hopi mas grandi unda cu e parti familiar a kibra un poco. Pero tambe a bin cu specialisacion nan nobo y tratamento nan mas moderno cu ta importante pa duna un miho cuido. Ezzard Cilié a splica cu awo den cuido medico tur tin un profesion y cu mester studia pe. E ta tuma sigur 4 aña pa por haya un diploma.
Pa esunnan cu t’ey despues di asina hopi aña, esaki ta mustra un lealtad cu bo no ta mira hopi mas awendia. Nan sigur mester tin un stimacion grandi pa locual nan ta haci y esey ta masha di aprecia. Tin cos cu Hospital ta haci cu ta na agrado di e trahadonan y cu nan ta keda asina largo tambe. Nos ta aprecia nos empleadonan y semper nos ta brinda diferente oportunidad pa nan crece den e trabou y nan conocemento.

Despues di e parti oficial na unda ta otorga e certificado y e pin brons, plata of oro a pasa un video cu mensahe di colega pa colega, cu a percura pa hopi emocion, recuerdo, harimento y anecdotanan di e cantidad di añanan di trabou. Pero al final e regalo mas grandi tabata e atardi cu nan a celebra cu nan coleganan pafo di trabao hunto cu sernan keri den un esfera sumamente ameno.

Hospital ta orguyoso di su empleadonan y ta gradici cada un hubilario y pensionado pa nan empuhe y perseverancia. Masha pabien!

You May Also Like

Discusion di Gobernador ta capitulo cera

Lo no a scapa e atencion di esnan cu a sigui e proceso di ...

Nada concreto ainda riba hotelnan nobo San Nicolas

Pa varios dia Bon Dia Aruba ta purbando pa haya mas informacion riba e ...

Screen Shot 2016-11-23 at 8.27.00 AM copy.jpg

Caso di famia cu a bebe juice venena ta bao investigacion

Diamars rond di 10’or anochi un famia a bay cumpra un orange juice pa ...

Dump (2).jpg

Parkietenbos lo wordo cera na comienso di 2017

Entrante 1 Januari 2017  lo stop di hiba sushedad  dump y e kimamento lo ...

Conflicto laboral den InselAir Aruba

Un par di dia despues cu InselAir na Corsou a informa cu lo bay ...

Pa 2017: Switch Foundation lo bin cu tres documentario

Switch Foundation tin basta tempo sin lansa un documentario Pa motibo cu nan tabata ...