Ayera pa casi 8’or anochi parlamento a aproba e Landsverordening houdende regels betreffende de integriteit van kandidaat-ministers of proyecto di ley cu ta stipula e normanan relaciona cu integridad di e ministernan. Cu un total di 12 voto pro (fraccion AVP) y 6 contra, e iniciativa di ley aki presenta pa parlamentario Marlon Sneek a pasa. Esaki despues di un debate largo, unda no a falta e tiramento di palabranan y acusacionnan personal.
MEP: Inconstitucional
Un aspecto cu oposicion particularmente di e fraccion di MEP a vota contra e proyecto di ley aki ta cu nan ta haya cu e ta inconstitucional, kiermen cu e ta den pugna contra nos constitucion. Tambe nan ta haya cu fraccion di AVP a bin trata e ley aki pa protege e minister Paul Croes cu ta bou investigacion como sospechoso di caso di corupcion.
Lider di e fraccion di MEP Evelyn Wever-Croes a bisa cu e iniciativa aki ta un prome paso; y nan ta haya cu un 90% e ley ta bon; pero e ta moralmente inaceptabel. P’esey nan a propone un nota di cambio of amienda pa bin cu un ley al estilo Corsou, te hasta cu poder retroactivo. “Nos a propone e amienda aki pa coregi algo ilegal y algo inmoral.”
Cu e amienda aki MEP tabata kier stipula reglanan fiho pa un candidato pa bira minister cu ta envolvi den cierto casonan cu ta contra integridad. Pero e nota di cambio aki no a haya aprobacion di e mayoria den parlamento, muy particularmente di e fraccion di AVP. Nan ta considera cu e amienda aki ta uno cu ta busca castiga of “busca un vengansa” politicamente contra un persona specifico pa no yega poder mas, esta minister Paul Croes kende ainda ta un sospechoso. Nan a argumenta cu e asunto aki nan a aregl’e den e nota di cambio. Nan a bay den pasado recordando cu Glenbert Croes tempo cu tabata minister tambe a confronta problema cu husticia; y awendia e ta miembro di parlamento di e fraccion di MEP.
AVP: no ta contra constitucion
Parlamentario Sneek cu a defende su iniciativa di ley tocante integridad y screening di candidato pa minister, a laga sa cu e ley aki a cana su caminda regular. Pues e ley no por ta nunca contra constitucion, ya cu el a wordo studia profundamente pa e huristanan di Directie Wetgeving En Juridische Zaken pa evita un violacion di nos constitucion. Mas bien nan a considera cu esaki tabata un excuus di oposicion pa vota contra e ley.
Tambe el a laga sa cu e ley aki no a wordo traha pa acomoda niun colega di partido, ya cu na aña 2014 ora cu el a presenta e proyecto di ley aki, minister Croes tabatin apenas algun lunanan como mandatario di e gabinete Mike Eman II. Sr. Sneek a bisa cu for di tres aña pasa nan a haci investigacion caminda nan combersa cu tur hende. “Nos no ta hues. Nos tin cu bin cu reglanan caminda cu ta den nos man, cu nos por coregi cosnan cu ta canando robes.”
E ley aproba segun sr. Sneek no ta contra nos constitucion ya cu e no ta kita e poder cu parlamento tin pa retira un minister. “Parlamento tin e ultimo palabra esaki a wordo atendi den e ley”, el a bisa. Ademas den caso cu un mandatario ta wordo condena, e ta keda afo di e gabinete. Pero prome cu esey, el a declara cu nan rol no ta di hues y nan no por dicta riba un persona, tampoco nan no ta recherche di e caso.
Sr. Sneek a reitera cu e ley aki no tin forsa retroactivo. “Pues bo no por bisa cu ma traha cu ley pa acomoda sr. Croes, pasobra e ley aki no ta aplicabel pa sr. Croes. E ley aki ta aplicabel pa e ministernan nobo di Gabinete Mike Eman III.”
