Ayera nos a manece cu e noticia cu e candela reciente na hospital a laga un parti vital di nan operacion malamente afecta. E espacionan normal di cuido intensivo (ICU) no tabata usable mas y mester a move e atencion specialisa aki pa otro parti di Hospital.

Tambe tabatin menos espacio disponible pa e diferente funcionnan, cu consecuencia cu cada un tin menos espacio. Consecuencia ta cu na e momento aki no tin servicio di ICU optimal, ni pa nos ni pa eventual turista cu cuminza bin nos pais atrobe. Como agravante e servicio ta limita na algun cama so, pasobra ta esey ta loke tin. Tur esey por haya comprension di nos banda? Depende con bo ta mir’e. Pa cuminsa, tur esaki a tuma lugar sin cu comunidad tabata sa algo. Si no ta pasobra e asociacion di specialista a bati alarma, ainda nos no lo tabata na altura. Esey ta implica cu na Hospital mes, ya caba aparentemente nan tabata dispuesto pa ‘siña biba’ cu e situacion manera cu e ta, te cu cualkier dia e situacion mehora. Mientras cu esey no ta e caminda di cana, pasobra, mescos cu mester haci awor, lo mester a busca solucion di biaha pa e problema aki, y esey no a sucede. Bunita, mientras centenares di empresa den turismo a busca y haya nan certificado di Health & Happiness, nos no tin e capacidad ni pa atende un brote local di Covid-19, mucho menos atende adecuadamente eventual problema cu por surgi ora frontera habri atrobe pa bishitante. E institucion clave den henter e asunto aki no tin certificacion, di ningun tipo!

Esaki ta trece nos riba otro aspecto di e asunto aki: no ta asina cu Hulanda a percura pa mas unidad di ICU, pa nos ta bon prepara pa cualkier eventualidad cu e pandemia por trece? Unda e material ey ta na e momento aki? Segun nos tin entendi, tur cos ta bunita asina den e container den cual nan a yega di Hulanda. Laga nos spera cu esey no ta berdad. En todo caso, nan no a keda instala na un lugar unda por haci uso di nan, punto. Cu esaki no solamente ta fayando den e preparacion pa Covid-19, cu por bolbe pa nos pareu nos habri frontera pa bishitante di exterior, pero nan ta fayando tambe den duna servicio adecua na nos propio hendenan. Pero aparentemente esey no ta di importancia pa esnan responsable dentro di Hospital, y asina leu cu nos por ripara te awor, tampoco pa e mandatario concerni.

Sin embargo, e ehemplo di con nos ta malmaneha asunto clave pa nos salud publico, no ta keda limita na nos opinion negativo tocante esaki. Kico pensa di esnan cu a percura pa nos haya e material aki, ora nan haya tende cu despues di tanto tempo ainda no a haci nada cu e material aki? Anto nos ta haya straño cu, despues di decenas di ehemplo di e categoria aki, na Hulanda nan ta bisa nan propio parlamento trankilamente cu “e islanan ey a proba cu nan no por maneha nan propio autonomia”, anto cerca nos e politiconan ta rabia? Rabia pasobra nan a bisa e mesun berdad cu tanto Arubiano cu curazon na e lugar corecto a bisa boso desde tanto tempo atras? Den tur loke nos a haya tende te awor di loke lo tin den e ya famoso 218 paginanan, no tin nada nobo, toch? Ta ser bisa cu mester baha cantidad di personal cu 1500 hende; algo nobo? Ta cuanto aña e tema aki ta actual? Nada no ta cambia, cu excepcion di e creciente cantidad di hende cu gobierno mester garantisa un salario cada dia 24 di luna. Si gobierno, den e circunstancianan di awe, ta keda insisti cu ningun hende ta perde trabao, anto necesariamente lo mester baha salario. Y nos no ta papia di loke a corta caba, sino loke ta na caminda ainda.

Cu nos mester bay introduci un BTW como impuesto central den nos sistema fiscal; algo nobo? Cuanto decada caba instancianan internacional ta maha na cabez di gobierno(nan), geel y berde, pero no, nan sa mihor, y ta hinca nos cu un sistema cu practicamente no tin uso mas na mundo, pa su efecto inflacionario. Ta parce cu esey no tin importancia pa nos mandatarionan, pasobra nan no tin molester di inflacion cu e tipo di salario cu nan tin. Pero nan ta lubida cu nan ta biba y dirigi un pais cu ta cuminza parce un favela grandi, cu un grupo grandi di hende cu no por logra haya e entrada pa nan tin un bida digno, y awor pa colmo no por ni percura pa atencion medico adecua, pasobra un set di burocrata tin cos mas importante pa haci?

Nos sa cu den e proximo dianan tur atencion lo bay atrobe na e guera cu Hulanda, pasobra nan kier pone orden unda nos mes hendenan a faya. Ta lanta critica pa e forma den cual nan ta hacie. Pero, nos ta tende un politico bisa cu no ta nan, pero nos mes mester hacie? Hospital no mester di un certificado di Health & Happiness, pero kico ta haci cu esnan responsable cu no a percura pa servicio ta adecua, pa nos y pa turista?