(NLTimes) – No ta bay dura largo prome cu hospitalnan na Hulanda yega na ‘code zwart’, unda no tin suficiente cama pa duna tratamento na tur persona cu tin mester di esaki. Den e caso aki, dokternan ta bay tin cu scoge na ken ta duna tratamento.

Hospitalnan ya caba ta enfrentando escogencianan dificil asina, segun Peter Langenbach, presidente di hunta di Hospital Maasstad na Rotterdam, a bisa Goedemorgen Nederland riba NPO 1.

Riba diabierna, minister di Salubridad Publico, Hugo de Jonge a bisa cu ainda ta ‘hopi leu’ di codigo preto den hospital. Pero esey no ta e caso, segun tanto Langenbach como e asociacion di enfermero y dunadornan di cuido V&VN. E cantidad di pashent hospitalisa pa coronavirus ta continua aumentando. Na mes momento, absentismo entre dokter y enfermeronan ta aumentando, sea pasobra nan ta infecta di Covid-19 nan mes of pasobra nan ta burn out despues di casi dos aña di crisis.

V&VN no ta complaci cu politica di gobierno. “Si bo mira e aumento den e cantidad di infeccion, bo ta mira cu e medidanan nacional no ta bay suficiente leu pa tin un efecto. Bo no por tene cuido di salud riba su pia cu e intervencion zwak aki”, miembro di hunta di V&VN, Jaap Kappert a bisa riba website di e asociacion.

Langenbach ta di acuerdo cu e asociacion di enfermero. “Awo nos ta dies dia despues di e conferencia di prensa y como nuebe dia despues cu a anuncia e medidanan, y ainda nos ta riba 20mil infeccion y un gran cantidad di admision [den hospital] pa dia”, el a bisa na e programa di radio. Segun su persona, e pakete actual di medidanan ta ‘insuficientemente coherente, insuficientemente comunica, y insuficientemente estricto’. Tampoco hende ta adheri na e medidanan. “Esey tin di haci cu e hecho cu nos tur ta fada. E stretch a laga bay den sociedad. Esey por bin hunto mediante un pakete di medida coherente cu ta mas facil pa splica.”

Langenbach a bisa cu hospitalnan ta wardando pa minister De Jonge declara code zwart pasobra nan ta enfrentando escogencianan extremadamente dificil caba. “E escogencianan ey en berdad ta formalisa den un scenario code zwart”, el a bisa. “Pa asina por usa otro criteria cu solamente esun medico pa finalmente dicidi ki pashent ta haya un cama na dado momento. Mi ta papia cu enfermeronan di ICU y intencivistanan cu ta bisa: duna nos sosten pa haci e escogencianan dificil aki, cual ya nos tin cu haci.”

Riba potret: Personal di ICU di hospital UMC Maastricht via Volkskrant.

LEAVE A REPLY

Please enter your comment!
Please enter your name here