(NLTimes) – E virus RS ta plamando asina lihe entre muchanan na Hulanda cu tur cama den Unidadnan di Cuido Intensivo pediatrico di hospitalnan Hulandes tabata ocupa diamars. Al menos un pashent hoben mester a wordo transferi na un hospital na Antwerp, AD ta reporta.
E brote di RS a cuminsa algun siman atras na Rotterdam y rapidamente a plama na Amsterdam y su alrededor, region Nijmegen y Limburg. E virus ta particularmente peligroso pa mucha chikito, cu por desaroya un infeccion respiratorio serio. Algun mester wordo hospitalisa pa oxigeno, likido of alimentacion via tubo. Awo tin muchanan seriamente malo na henter e pais, y tur 90 cama di ICU pediatrico na e pais tabata ocupa riba diamars.
E virus RS usualmente ta plama durante winter, pero pa motibo di e lockdown di coronavirus, casi ningun mucha a keda infecta winter ultimo. E medidanan cu ta stop transmision di coronavirus tambe ta stop transmision di otro virus. Y ya cu e virus RS usualmente no ta presente durante berano, hospitalnan Hulandes no tabata prepara pa e fluho aki di pashent.
“Siman pasa tabata dificil den nos region. Tabatin solamente camber pa muchanan na Den Helter y tambe nos mester a transferi mucha na e ICUnan na Groningen y Maastricht”, Hans van Goudoever, cabesante di Hospital di Mucha Emma na Amsterdam y vocero pa asociacion pediatrico Hulandes, NVK, a bisa AD. “Ta malo suficiente ora mester admiti bo yiu den hospital, y despues pa esaki tuma luna asina leu.”
Varios hospital, incluyendo Hospital di Mucha Emma, mester a cancela cirugianan planea. “Normalmente nos ta mira e multitudnan aki den winter. Mi ta wanta mi rosea riba e cantidad di infeccion di coronavirus, pasobra pronto tambe nos ta bay tin enfermera cu mester bay den cuarentena”, Van Goudoever a bisa.
Region di Nijmegen ta enfrentando situacionnan similar. “Awo nos mester a pospone un cantidad di cirugia planea pa muchanan cu por tin mester di un cama den nos ICU pediatrico despues di cirugia. Esaki claro ta hopi fastioso pa e mayornan y muchanan involucra, pasobra nan tabata conta cune”, segun Jan Peter Rake di Hospital di Mucha Radboudumc Amalia a bisa.
Siman pasa, muchanan di otro regionnan a keda admiti den ICU di e hospital na Nijmegen. Awo, e muchanan tambe ta birando malo na Nijmegen, Rake a bisa.
