Warda di 16 ora, y un averahe di 52 dia pa aña malo ta nifica peso grandi di overtime

Overtime na Instituto Coreccional Aruba, KIA tabata 27 porciento di tur e gasto di personal na 2018. Aunke e ta un reduccion compara cu e aña prome, e ta 11 porciento mas halto cu locual e cifranan di 2014 tabata.

E averahe di dianan malo pa trahado ta 52, cu ta resultado di un averahe di 15 biaha cu e trahadonan ta ‘meldziek,’ y tur esaki, pero principalmente e falta structural di personal ta contribui na un pago structural di overtime.

Esaki ta locual Auditoria General di Aruba, ARA a menciona den su rapport ‘‘Motibo Aumento Overtime.’ ARA a compila e estudio pa aña 2018 y a enfoca riba tres servicio cu ta Cuerpo Policial di Aruba, KPA, Instituto Coreccional di Aruba, KIA y Cuerpo Especial Arubano, CEA. Ta trata di investigacion cu ARA mes a dicidi pa haci, pa asina presenta na Minister encarga y Parlamento pa deliberacion. Pa tal motibo mes no tin conclusion ni tampoco recomendacion.

Na KIA, a observa un fluctuacion di gasto di personal entre 2013 pa 2018, y tambe cu overtime tin fluctuacion. Contrario cu ta e caso cu Cuerpo Policial di Aruba, KPA, no tin pieknan special pa overtime durante aña. Locual si a nota ta cu na 2017 tabatin un piek halto y cla na luna di Juni, pa un suma di 400 mil florin. Segun KIA, esaki ta pa motibo cu trahadonan ta purba acumula mas overtime den luna di Mei pa ora cu ricibi e vakantie-uitkering na Juni, tin entrada adicional.

Motibo

Mescos cu ta e caso na KPA, tin diferente motibo pakico mester traha overtime na KIA. ARA a reparti e motibonan den tres area cu ta organisacion, personal y maneho.

Pa loke ta e organisacion, KIA tin como tarea principal, proteccion di sociedad contra individuonan considera peligroso y e estadia obligatorio como castigo cu alabes na un funcion di ehempel pa otro, potencial criminal. Banda di esey, KIA mester hisa e posibilidad di detenidonan pa bolbe sociedad na un forma exitoso.

E instituto ta reparti den cinco departamento, cu ta inclui e seccion di detencion, siguridad y cuido di detenido. Ademas tin administracion, cantina, area di trabou, biblioteca, planificacion, servicio medico y e sala di camara.

No tur departamento ta rekeri overtime. Administracion y biblioteca ta traha segun ora di oficina y no tin overtime. E seccionnan cu mas overtime ta esnan di Siguridad, Servicio Interno y Camber di camara. Ta trata di seccionnan cu ta draai warda henter dia y ta responsabel pa e operacion principal di KIA.

No por sin overtime

Pa motibo di falta di personal, e ta imposibel pa no opera KIA haciendo uso di overtime. KIA a bisa cu e instituto mester percura cu ta logra e ocupacion minimo di personal pa seccion pa asina por garantisa siguridad tanto paden como pafo di KIA. Pero pa motibo di falta di personal, KIA por unicamente percura pa siguridad paden di e murayanan, pues di e instituto mes.

E seccionnan den KIA cu ta rekeri mas overtime ta esnan cu tin mas trabou tambe, por ehempel pa percura pa e programanan di dia di detenidonan. Pa por organisa esakinan debidamente mester tin e siguridad debido y mas hende. E ocupacion minimo ta den oranan di anochi.

E seccionnan relativamente nobo, cu ta e camber di camara y servicio medico a trece cune cu mester a hala personal di otro sector pa yena e vacaturanan, cu atrobe ta crea necesidad pa overtime.

Ademas, trahadonan di e seccionnan aki ta forma parti tambe di e unidad di cacho, e K9 unit, cu ta activo durante dianan specifico manera dianan di bishita of ora cu mester haci e buskeda pa telefon celular y droga den e celnan. E unidad K9 ademas ta garantisa e siguridad paden y pafo di e instituto, den cooperacion cu KPA. Esaki atrobe, pa motibo di falta di personal.

(Articulo ta continua riba pagina 6.)

Potret di KIA: Ret Karibense.

LEAVE A REPLY

Please enter your comment!
Please enter your name here