E caso penal contra e chauffeur Colombiano O. Duran Peña, di 36 aña, cu ta enfrenta acusacion di homicidio culposo, bandona e lugar di accidente y stuur bao di influencia di alcohol despues di un accidente fatal cu a costa bida di un turista, lo mester sigui cu investigacion adicional prome cu Corte por yega na un decision final.
Ayera mainta durante locual mester tabata uitspraak di e caso, hues a anuncia cu e dossier actual ainda no ta contene suficiente evidencia pa dicta sentencia, a pesar cu tanto Ministerio Publico (OM) como defensa ya a presenta nan argumento den e caso.
E accidente a tuma lugar dia 27 di december 2025, ora dos turista, mama L. Barnett y su yiu muhe M. Rodriguez, tabata canando den Caya Musica. Segun OM, Duran Peña a dal e dos peaton cu su auto mientras cu e tabata stuur bao di influencia di alcohol. Despues di e impacto, el a bandona e lugar di accidente sin para pa brinda ayudo. Barnett, kende a keda gravemente herida, a ser interna den unidad di cuido intensivo y a fayece dos siman despues. Su yiu muher a sobrevivi e accidente, pero a sufri heridanan fisico y consecuencia psicologico.
Durante e tratamento di e caso, cu a tuma lugar 12 di juni, OM a sostene cu e evidencia ta mustra cu Duran Peña a stuur cu negligencia grave. Segun OM, investigacion a revela cu e acusado tabata den un bar restaurant pa varios ora consumiendo un cantidad considerable di bebida alcoholico prome cu el a subi den auto. Ademas, e auto cu e tabata core tabatin diferente deficiencianan tecnico, incluyendo luznan dilanti cu no tabata traha bon y bentana cu tabata di mas scur door di glas getint. OM tambe ta argumenta cu e acusado tabata familiar cu e situacion di Caya Musica y cu pa e motibo ey, e mester a core cu mas cautela.
Defensa, di otro banda, a pidi absolucion. Segun abogado di Duran Peña, no tin suficiente prueba pa conclui cu su cliente tabata bao di influencia di alcohol durante e accidente. Defensa a señala cu polis no a haci examen di sanger ni otro test adicional cu, segun nan, por a confirma e grado di intoxicacion. Tambe a argumenta cu e peatonnan tabata obliga pa sali for di e area cu tabata cubri cu yerba y subi riba caminda, creando un situacion cu e chauffeur no por a evita. Segun defensa, e accidente tabata inevitabel den e circunstancianan presenta.
Sinembargo, hues a indica cu e pregunta principal cu Corte mester contesta no ta solamente si e acusado a actua cu negligencia, sino tambe si un relacion directo entre e accidente y morto di señora Barnett por ser comproba. Segun Corte, e dossier actual ta contene informacion cu e victima a ser haya gravemente herida na banda di caminda y cu despues a fayece den hospital, pero no tin ningun rapport medico cu ta describi cual heridanan exacto el a sufri ni kico tabata e causa oficial di su morto.
Hues a enfatisa cu, sin documentacion medico cu ta confirma e relacion entre e heridanan y e morto, Corte no por automaticamente conclui cu e fayecimento tabata un consecuencia directo di e accidente. Pa e motibo ey, Corte a ordena OM pa incorpora den e dossier tur rapport medico relevante, incluyendo informacion tocante e heridanan di e victima y e causa oficial di su morto. Segun hues, solamente despues cu e informacion ey ta disponible Corte por evalua e responsabilidad penal di e acusado tocante e acusacion di homicidio culposo.
Ademas di e aspecto medico, Corte a determina cu tin necesidad tambe di mas claridad tocante e manera exacto con e accidente a tuma lugar. Durante e audiencia, Duran Peña a declara cu e si a wak e dos peaton riba caminda, pero solamente na un distancia relativamente cortico, momento cu, segun e, ya no tabatin posibilidad pa evita e impacto. El a splica cu e area tabata cubri cu yerba y cu peatonnan regularmente ta subi riba caminda pa sigui nan ruta. El a admiti cu despues di e impacto e no a para, pero a sigui core pasobra, segun su declaracion, e tabata den estado di shock.
Hues, sinembargo, a pone diferente pregunta critico tocante e declaracion di e acusado. Corte a señala cu, si Duran Peña tabata conoci cu e situacion di e caminda y tabata sa cu peatonnan regularmente mester subi riba asfalt pa evita e yerba, e tabatin obligacion di anticipa cu esey por a sucede y adapta su manera di core auto.
Pa logra un cuadro mas completo di e ultimo momentonan prome cu e impacto, Corte a ordena cu M. Rodriguez, e yiu muher di e victima, mester ser scucha oficialmente como testigo. Durante e audiencia Rodriguez tabata presente pa medio di videoconferencia y anteriormente a haci uso di su derecho pa expresa e impacto cu e accidente tabatin riba su bida. Segun hues, aunke e declaracion por ta emocionalmente dificil pa e testigo, su testimonio ta esencial pa e evaluacion di e hechonan.
Durante e tratamento di e caso, Rodriguez a splica cu e accidente a cambia su bida por completo. El a splica cu e y su mama tabata na Aruba pa pasa vakantie ora e tragedia a sucede. Segun su declaracion, ademas di heridanan fisico, e ta sigui sufri di trauma psicologico, flashback y otro consecuencia emocional relaciona cu loke a pasa. Tambe el a bisa cu e ta profundamente afecta pa e perdida di su mama.
Na su turno, Duran Peña a pidi disculpa na Rodriguez. Visiblemente emociona durante e audiencia, el a declara cu nunca tabata su intencion pa causa e tragedia y cu ningun palabra por trece su mama back. El a expresa speransa cu algun dia Rodriguez por haya forsa pa pordon’e.
OM a solicita un condena di tres aña di prison, cu un prohibicion di cuater aña pa stuur auto. Segun OM, e gravedad di e hechonan, e consumo di alcohol, e decision di bandona e lugar di accidente y e consecuencia fatal di e impacto ta hustifica un condena di prison. Defensa, di otro banda, ta mantene cu no por ser comproba cu Duran Peña actua cu culpa criminal y ta insisti cu su cliente mester ser declara inocente.
Despues di analisa e posicion di e dos partido, Corte a conclui cu ainda no ta posible dicta sentencia. E dossier lo ser transferi pa hues comisario, kende lo ta encarga oficialmente cu scucha Rodriguez como testigo y cu incorpora e documentacion medico cu falta den e dossier. Solamente despues cu e investigacion adicional ey ta completa e caso lo bolbe dilanti di Corte pa un siguiente audiencia.
Mientras tanto, Corte a dicidi cu Duran Peña lo permanece den detencion preventivo. Segun hues, e sospechonan serio contra e acusado ta sigui existi y actualmente no tin circunstancianan personal cu ta hustifica su liberacion durante e investigacion adicional. Corte a indica cu lo trata di programa e siguiente audiencia mas pronto cu ta posible, pero no mas largo cu cuatro luna, conforme cu e termino legal aplicabel pa detencion preventivo.
