Ayera mainta, Chania Fernandes-Pedra, chauffeur acusado den e hit and run fatal cu a tuma lugar na comienso di aña cu a cobra bida di dos persona, a presenta den corte. Sinembargo, pasobra e no tabatin representacion legal, tratamento di e caso no por a sigui. Durante e audiencia, e acusado a pidi pa por warda su caso den libertad, pero corte a rechasa e peticion despues di considera e argumento di Ministerio Publico (OM) y e circunstancianan di e caso.

Fernandes-Pedra ta e chauffeur acusado den e accidente di hit and run cu a tuma lugar dia 4 di januari 2026, den cual dos peaton, Josely Paulina Vasquez Gonzalez y Carlos David Vialez Valerio, a perde nan bida. E caso a genera hopi conmocion den comunidad y ta entre e procesonan penal cu a ricibi mas atencion publico durante e aña aki.

Durante e audiencia di ayera hues no por a trata e caso den contenido pasobra e acusado a presenta den corte sin representacion legal. Esaki a impedi cu tratamento integral di e caso por a sigui manera originalmente tabata plania.

Un di e motibonan cu e acusado no tabatin representacion legal ta relaciona cu e sentencia recien di Hof confirmando cu e abogado Hulandes, Yehudi Moszkowicz no por actua como defensor na Aruba, pues no por representa Fernandes-Pedra legalmente, pasobra e no ta inscribi den e registro di abogado cu tin derecho di representa cliente na Aruba. Aunke Moszkowicz tabata presente den sala di audiencia, e no por a papia den nomber di Fernandes-Pedra.

E presencia di abogado Moszkowicz a causa un poco tension pa motibo cu el a presenta den Corte cu su toga di abogado bisti, sabiendo cu e no por representa Fernandes-Pedra legalmente. Ademas di esaki el a bisti e toga y laga esaki habri, locual Corte ta considera como un falta di respet. OM a cuestiona esaki y consecuentemente hues a pidi Moszkowicz pa kita e toga.

OM a presenta oficialmente e acusacionnan cu Fernandes-Pedra lo enfrenta ora tratamento di contenido di e caso cuminsa.

Segun fiscal di OM, e acusado ta enfrenta cinco acusacion principal relaciona cu e evento di 4 di januari. E acusacion mas serio ta homicidio. OM ta sostene cu Fernandes-Pedra tabata core un Jeep Compass sin un rijbewijs valido, bao di influencia di alcohol y na un velocidad considerablemente mas halto cu loke ta permiti.

Segun e acusacion, e velocidad tabata asina halto cu e chauffeur no tabatin posibilidad di para su vehiculo na un distancia cu e por a observa e situacion di trafico y reacciona apropiadamente. OM ta sostene tambe cu e acusado no a pone suficiente atencion na e peatonnan cu tabata crusando caminda, tabata core parcialmente of casi completamente memey di caminda y no a tuma accion pa evita e impacto tampoco.

Ademas di homicidio, OM a presenta acusacion subsidiario pa violacion di Ley di Trafico y, alternativamente, pa pone otro usuario di caminda na peliger. E dossier penal ta inclui tambe dos acusacion di intento di homicidio relaciona cu otro dos persona, yiu di e victimanan, Yhoely Willems y su casa Hector Fernandez, kendenan a sobrevivi e accidente. Alternativamente, OM ta sostene cu e hecho por cualifica como intento pa causa heridanan corporal grave.

E di tres acusacion ta relaciona cu e decision di sigui core despues di e accidente sin para na e lugar di e sucedido. E di cuatro acusacion ta stuur bao di influencia di alcohol, y e di cinco acusacion ta stuur sin un rijbewijs valido.

Durante e audiencia, hues a informa tambe cu investigacion den e caso ainda no a termina. Segun Corte, diferente documento nobo a ser agrega recientemente na e dossier, incluyendo e decision di Hof, documentacion relaciona cu declaracion di testigonan, y un carta di abogado Yehudi Moszkowicz.

Hues a splica tambe cu e mes a bira responsable pa maneha caso recientemente despues cu un otro colega a transferi e caso p’e. Despues di revisa e documentacion, el a conclui cu ainda tin varios punto cu mester aclaracion adicional prome cu tratamento integral di e caso por sigui.

Un di e investigacionnan cu ainda ta pendiente ta relaciona cu e sistema electronico (hard drive) di e vehiculo cu e acusado tabata core e dia di e accidente. Corte a confirma cu tin contacto cu autoridadnan na Hulanda pa determina si ta tecnicamente posible pa recupera dato for di e hard drive di e auto.

OM a indica cu ya nan a solicita oficialmente e investigacion tecnico. Si logra recupera e informacion di e hard drive, esey por inclui informacion relevante tocante velocidad cu e vehiculo tabata core, si e chauffeur a brake y otro dato cu por yuda aclara e circunstancianan exacto di e accidente. Fiscal, sinembargo, no por a indica cuanto tempo e proceso tecnico lo tuma.

Ademas di e investigacion tecnico, corte ainda ta wardando e rapport di un investigacion psicologico. E rapport aki por ta un elemento adicional den e dossier y por ser considera durante tratamento di e caso.

Pa controla e progreso di e investigacionnan pendiente, Corte a programa un regiezitting pa dia 20 di augustus. Durante e audiencia ey, e hues lo evalua con e diferente investigacionnan ta progresa y si e dossier ta completo pa sigui cu e proceso.

Si tur documentacion y investigacion pendiente ta cla na e momento ey, tratamento integral di e caso lo tuma lugar dia 2 di october. Durante e audiencia ey, corte lo examina e evidencia, tende posicion di OM y defensa y despues lo determina si e acusacionnan a keda proba.

Durante e audiencia ayera, Fernandes-Pedra a tuma e oportunidad pa lesa un carta cu el a skirbi hunto cu abogado Moszkowicz. Den e carta el a pidi hues pa considera e posibilidad di lag’e liber mientras e ta warda e tratamento di su caso. Den su peticion el a indica cu e no ta un criminal, cu nunca antes e tabata den problema cu husticia, y cu e accidente tabata un accidente teribel y no un acto cu el a plania lo sucede e dia ey ora el a sali di su cas.

E acusado a expresa cu e accidente a cambia su bida pa semper y cu e ta carga cu e consecuencia emocional di loke a pasa. El a bisa cu e no ta representa un peliger pa sociedad y cu e ta dispuesto pa cumpli cu cualkier condicion cu corte impone si e peticion pa libertad temporal keda aproba. Entre e condicionnan cu el a menciona tabatin posibilidad di un obligacion di reporta regularmente, un prohibicion di stuur auto of otro condicionnan cu corte lo considera apropia.

Fernandes-Pedra tambe a bisa cu su situacion den KIA ta afecta su salud mental. Segun e, un tratamento psicologico externo lo por contribui na su recuperacion emocional mientras e proceso penal ta sigui. El a recorda corte cu ainda no tin un sentencia den su contra y cu, segun e principio fundamental di derecho penal, un sospechoso mester ser considera inocente te ora culpabilidad keda proba den corte.

OM a opone rotundamente na e peticion. Fiscal a argumenta cu no tin motibo pa modifica e detencion preventivo den un caso cu ta trata hecho penal asina grave. Segun OM, e circunstancianan di e caso no ta hustifica cu e acusado por ser laga na libertad mientras ta warda pa e tratamento di e caso.

Despues di scucha e peticion di Fernandes-Pedra y e reaccion di OM, hues a tuma un break di 15 minuut pa delibera e argumentonan. Despues e break, hues a anuncia su decision. El a rechasa e peticion di Fernandes-Pedra y a ordena pa e keda den detencion. Segun hues, e gravedad di e acusacionnan y e impacto profundo cu e caso tin den comunidad ta pisa hopi den e evaluacion. Corte a conclui tambe cu actualmente no tin condicionnan suficiente cu por garantisa cu e acusado por warda su caso den libertad. Fernandes-Pedra lo permanece den detencion preventivo na KIA.

Hues a dedica tambe atencion na e situacion relaciona cu e falta di representacion legal di e acusado. Segun hues, durante e prome audiencia pro forma, Fernandes-Pedra tabatin e representacion di abogadonan Illes y Emerencia. Despues, Corte a ser informa cu abogado Boyce lo uni na e ekipo di defensa. Poco despues, Illes y Emerencia a notifica Corte cu nan no lo sigui representa e acusado y cu Boyce lo asumi e defensa.

Mirando cu Boyce tin hopi aña cu no a trata casonan penal, e acusado a haci un peticion pa abogado Moszkowicz tambe por forma parti di su defensa. Sinembargo, Hof a rechasa e peticion, argumentando cu Moszkowicz no ta inscribi pa eherce como abogado na Aruba. Despues di e decision ey, Boyce tambe a retira for di e caso, loke a laga Fernandes-Pedra sin representacion legal.

Durante e audiencia, e acusado a indica cu lo presenta un peticion nobo pa Moszkowicz por ta su representacion legal. Hues, sinembargo a urgi Fernandes-Pedra cu si e peticion keda rechasa atrobe, e mester busca un abogado cu ta autorisa pa eherce na Aruba. El a bisa e acusado cu pa e siguiente audiencia di 20 di augustus ta su responsabilidad pa sigura cu e tin representacion legal.