Johnny Depp a bisa ayera cu ex-esposa Amber Heard a haci acusacionnan ‘enfermo’ di abuso y falsamente a tach’e di monster, mientras e actor a testigua den un caso di difamacion na Reino Uni, cu ta depende riba ken tabata e agresor den e relacion toxico y violento di e pareha famoso.
Depp ta demandando e tabloide Britanico The Sun tocante un storia na 2018 cual su titulo ta inclui ‘wife beater Johnny Depp’. E abogadonan di e corant kier usa acusacionnan di abuso di Heard contra Depp pa defende e acusacion cu Depp a bati su casa.
Depp fuertemente ta rechasa acusacion di Heard, cu el a atak’e durante nan matrimonio, y ta demandando editor di The Sun, News Group Newspapers, y su editor ehecutivo, Dan Wootton. “E acusacionnan enfermo aki ta completamente falso”, Depp a bisa den un declaracion por escrito, agregando cu acusacionnan di Heard a afecta su carera y ta ‘un problema constante den mi casting’.
Un huicio di tres siman tocante su acuscion di difamacion a cuminsa ayera na Corte Supremo na London. Ta un di e prome casonan mayor cu lo tuma luga en persona desde cu Reino Uni a cuminsa elimina su lockdown pa coronavirus.
Depp a drenta e box di testigo di e corte y a cuminsa tumando un huramentacion y dunando su nomber completo: John Christopher Depp II.
El a bisa e corte cu Heard a ‘bisa mundo cu e tabatin miedo pa su bida for di mi, y cu mi tabatin asina un monster horibel, si bo kier. Cual no tabata e caso’.
Depp (57) y Heard (34) a conoce otro den set di e comedia di 2011, The Rum Diary, y a casa na Los Angeles na februari 2015. Nan a divorcia na 2017, y awo ta acusa otro di abuso.
Depp y Heard a drenta via portanan separa na e corte. Ambos a cubri nan boca y nanishi na yegada. A plama e procedimento riba varios sala pa permiti distanciamento social.
Mientras cu Heard no ta den e huicio, e caso tambe ta un demostracion entre e ex-pareha, kende ta acusa otro di ta controlador, violento y engañoso.
Defensa di The Sun ta depende riba acusacion di Heard di 14 incidente di violencia di Depp entre 2013- y 2016, na Los Angeles, Australia, Hapon, Bahamas y un jet priva. E ta rechasa nan tur y ta bisa cu Heard a atak’e cu obhetonan incluyendo un bleki di bebida y un sigaria. Tambe e ta acusa Heard of un di su amigonan di a defeca riba su cama.
Den declaracionnan di testigo, Depp a bisa cu na Australia na 2015 Heard a corta tip di su dede door di tira un boter di vodka riba dje. Un potret di e dede na sanger tabata inclui cu su declaracion. Segun Depp, den otro ocasion Heard a dal’e varios biaha den su cara abordo di un jet priva, forsando e pa keda henter e vuelo cera den baño.
Den corte, Depp a describi un incidente den cual Heard a bisa cu Depp a dal’e, bisando cu tabata lo opuesto. “Manera semper, cos a escala y bira fisico, terminando den un pelea. Heard a dal mi”, el a bisa.
Depp a bisa cu Heard tabata ‘un personalidad bipolar diagnostica, calculador, un sociopata; e ta narcisista y e ta completamente emocionalmente deshonesto’.
Heard ta bisa cu Depp tabata bebe, usa droga y bira violento. Depp a reconoce cu el a lucha cu fama, bisando cu esey a nifica cu e tabata ‘forsa pa biba bida di un fugitivo’ sin anonimidad. El a reconoce cu a usa un cantidad di droga durante añanan, incluyendo marihuana, cocaina, LSD, ecstasy, magic mushroom y analgesico di prescripcion. El a bisa cu su abuso di droga a cuminsa cu su 11 aña di edad den un cas instabil. Tabata ‘e unico manera cu mi a haya pa calma e dolor’, el a bisa.
Abogado di The Sun, Sasha Wass a describi Depp como un persona cu problema di rabia, mencionando un aresto na 1989 pa abuso y un incidente despues den cual el a kibra un camber di hotel na New York. “Mi tabata rabia, pero esey no kiermen mi tin un problema di rabia”, Depp a bisa. “Mi tambe ta expresa mi mes hariendo. Mi no tin un problema di humor.”
Heard ta programa pa duna evidencia despues den e huicio. Abogado di Depp, David Sherborne, a bisa cu Heard a puntra recientemente pa un acusacion wordo presenta den priva, ‘pa su supuesto naturalesa teribel’. Sherborne a bisa cu e actor a demanda The Sun ‘pa limpia su reputacion’. “Esaki no ta un caso tocante placa. E ta tocante vindicacion.”
