Gabinete Hulandes por sigui exigi ‘condicionnan streng’ a cambio di fiansanan di emergencia pa Aruba, Corsou y Sint Maarten. E demostracionnan, peticionnan y cantidad di cartanan no ta trece Tweede Kamer na otro conclusion.

E impacto di corona riba e islanan ta ‘enorme’, pero ta falta perspectiva riba e islanan, asina secretario di estado Raymond Knops (relacionnan di Reino) a conta parlamento Hulandes ayera. “Mas cu 10 mil personanan ta sin trabou, hende ta insigur di nan futuro. Turismo a para completamente, e entradanan a seca ful.”

Henter parlamento Hulandes ta convenci cu ta momento pa e islanan introduci reformanan substancial. Tambe ta un oportunidad pa e gobiernonan cuminsa haya mas entrada di loke nan ta gasta. “Tin diferencia grandi den entrada y ta paga mucho tiki belasting”, segun Knops. Salarionan astronomico mester baha, servicio di impuesto mester mas apoyo, y mester diversifica economia mas leu cu djis turismo of industria di zeta. Segun Knops esaki ta cosnan cu ‘ya mester a pasa hopi tempo pasa caba’.

‘E pober mester entrega y e rico no?’
Riba Corsou siman pasa tabatin demostracionnan cu a yega te na kimamento di areanan pasobra trahadonan di Selikor, docentenan y agentenan policial mester entrega. E pakete di condicionnan laboral di tur ambtenaar mester baha en total cu 12.5%.

Loke ta remarcabel pa parlamento Hulandes ta cu ta mustra cu ambtenaarnan den puesto halto cu ta gana ton di placa (ainda) ta exclui di entrega. Asina Knops ta contesta preguntanan di parlamentario van Raak, di SP. D66, GroenLinks y PvdA kier garantia cu e condicionnan estricto no toca e carteranan mas chikito. Sinembargo segun Knops, esey ta algo cu gobierno di Corsou mes ta scoge pe.

“Tin un escogencia cu por haci pa desvia di esey por medio di pone mas belasting riba esunnan cu gana hopi. Mi lo tuma contacto cu e paisnan pa asina sigui riba e liña aki.”

Prome minister Eugene Rhuggenaath di Crosou ta bisa cu no tin un decision final ainda y ta spera cu lo por yega na un acuerdo cu e sindicatonan riba e manera con ambtenaarnan lo mester bay entrega.

Hulanda ta priminti residentenan di Aruba, Corsou y Sint Maarten ‘perspectiva’

E secretario di estado a bisa cu e preocupacionnan riba e islanan tin su oido y cu e ta compronde nan. E ta priminti den nomber di gobierno Hulandes pa ofrece e residentenan di Aruba, Corsou y Sint Maarten ‘perspectiva’ (economico) a cambio di e proposicionnan.

Den e añanan nos dilanti lo bay miyones direccion di e islanan, pero esey ta nifica cu nan mester bay di acuerdo cu e deseonan di Den Haag. “Solamente si Hulanda haya hopi placa di pagado di belasting Hulandes, nos por manda placa riba resultadonan y pa un bon futuro di e islanan.”

“Esey ta exigi ofertanan y liderazgo. Cual den nos caso ta pone condicionnan”, Knops a bisa. “No tin espacio pa keda rek e situacion mas. Pasobra si nos ta sigui haci loke nos a haci, nos ta haya loke nos a haya: poco resultado y relacionnan spina”, Knops a bisa.

Con cu bay bin islanan por conta riba apoyo

E miedo ta cu lo sigui depende riba pakete di cuminda si no reestablece economia pronto. Gabinete Hulandes a sigura cu e islanan por conta cu tur tipo di apoyo necesario, y cu esakinan lo bin ‘sin mas’. Hasta si e islanan na cierto momento no sigui bay di acuerdo cu e exigencianan Hulandes pa por haya e prestamonan Hulandes.

Knops a bisa diaranson ultimo cu e ta mira e islanan den Reino ‘como famia’, mescos cu su colega di partido Chris van Dam.

Investiga placa desapareci pa trece entrada pa caha di gobierno

Partido VVD kier activa e Fiscale Inlichtingen en Opsporingsdienst (FIOD) pa investiga placa ‘desapareci’ riba e islanan. “Unda e placa a keda cu tabata bou Gerrit Schotte (ex premier di Corsou)? Un cantidad di 10, centenares di miyon.”

Segun Knops Hulanda ta cla pa yuda cu haya mas placa den caha di gobierno, pero pa esey e islanan tin cu pidi ayudo. “Nos tin experticio cu nos por aporta, nos mes a haci fout pero nos a siña hopi di nan”.

D66 kier pa politica Hulandes pone mas confiansa den e islanan, pa asina por coopera mas. “Mi ta kere cu nos por nifica hopi mas di loke nos ta nificando pa otro,” Knops a expresa. “Te dia di awe mi no a rechasa ningun peticion.”

LEAVE A REPLY

Please enter your comment!
Please enter your name here