Hulanda no ta tuma nos na serio? Ban cuminsa tuma nos mes na serio…

Den e dianan prome cu e bishita di minister Kajsa Ollongren di Asunto Interior y di Reino, hunto cu e responsable pa cartera di Reino, Raymond Knops, nos a tende varios comentario tocante asunto cu mester por regla miho cu Hulanda, ademas di observacion cu “nan no ta tuma nos na serio.”

Tabata interesante anto pa haya sa si durante e bishita di e mandatarionan e topiconan candente aki a bin dilanti. Sin embargo, for di e rueda di prensa di ayera a resulta cu na no tabatin e intencion di bay trata asunto di peso. Durante e rueda di prensa ayera e dos personanan responsable na Hulanda pa asunto di Reino a mantene nan mes ‘op de vlakte’ y no tabata desea di move den teritorio conflictivo. Sin embargo, asina mes tabatin algun punto cu pa nos tabata un confirmacion cu na Aruba tin vez tin hende cu ta demasiado pura pa saca conclusion, a base di mal informacion, o informacion incompleto.

Esey tabata e caso por ehemplo cu e asunto di fia placa na interes hopi abao via Hulanda. E impresion cu a duna poco prome cu e dos mandatarionan a yega Aruba, cu lo a bay papia di e tema aki, creando e impresion cu e momento por ta oportuno pa haci esaki. Esey no tabata e caso y Knops a bisa cu enfasis cu e asunto ey no ta al caso. Pa por papia di e tema ey, prome Aruba lo mester ta riba bon caminda pa kita e condicionnan for di mesa cu a hiba na e intervencion Hulandes den nos asuntonan financiero. Por ehemplo, lo mester ta dunando un bista faborable pa loke ta cumplimento cu e deficit fiscal, cu pa e aña aki ta stipula na -0,5% di GDP. Nos ta bay logra esey? Dificil pa bisa, pasobra ya caba nos ta haya señal di cierto mal noticia, por ehemplo cu Citgo no lo cumpli cu pago di e lease anual cu nan debe a base di e convenio cu Aruba. Tambe e perdida di empleo lo tin cierto consecuencia pa entrada di gobierno. Gobierno a anuncia aña pasa caba cu nan no ta conta cu e rehabilitacion y operacion di e refineria, pero ora henter e operacion dal para, gran parti di esnan emplea lo bay cas. Un grupo chikito lo por pasa pa Refineria di Aruba, pa atende e tareanan relaciona cu entrada di combustible pa Aruba, y e trabaonan relaciona cu e terminal di crudo. Riba esaki por conta tambe e perdida di trabao cerca e contratistanan cu tabata opera riba e tereno di e refineria.

Si Aruba logra mantene un resultado positivo den crecemento economico, tin un beneficio chikito cu lo bay pa gobierno den sentido di mas entrada, pero esey lo depende mas tanto di resultado di turismo. Y, pa bolbe na e normanan di 2019 – 2021, si nos no logra cumpli na 2019, anto automaticamente 2020 ta bira mas dificil pa cumpli tambe. Conclusion: nos mester di bon suerte o bon planificacion rapido, pa bin cu iniciativa cu por mantene nos riba e bon caminda.

Otro tema di cual a papia demasiado di antemano caba, ta e asunto di refugiado. Aki tambe nos ta topa cu cos cu ta papia y comenta di antemano, cu al fin y al cabo, no ta resulta na nada, y no tabatin pakico. Tanto energia y placa cu a hinca den biahamento pa bay Hulanda y Union Europeo, pa bay convence nan… convence nan di kico? Bo tin un problema di refugiado no visible, y banda di esey bo tin un problema considerable di persona indocumenta di miles, y no Venezolano so, cu bo tin pa mas di 25 aña caba, y kico bo a haci cune? No ta berdad cu tur e añanan ey bo a laga nan drenta, biba, traha y procrea aki riba, y nos no por kere cu e Hulandesnan no sa esey. Ta pesey tambe cu henter e wega di ajedrez no a avansa den ultimo tempo, y Aruba no por haci nada mas cu mustra riba e importancia di bon preparacion, y no sinta warda te ultimo ora, pa nos haya un asalto den forma di un fluho cu nos no por maneha. Pues presenta e plannan bon ey y haci e preparacionnan necesario, punto. Pero ki mester tabatin pa bay lobby na Bruselas y bolbe y bisa cu tin 6 miyon euro ta warda nos, ademas 10 miyon otro aña… Awor ta bin resulta cu ta 6 miyon euro total pa e region, no pa nos so… Comentario negativo pasobra ta duna Colombia un misero 4 miyon euro, pa atende un miyon y mey di hende, anto aki na Aruba ta grita cu “nos tambe kier” y cu lo tabata inhusto cu nos no ta haya nada… Anto nos no por ni cuantifica con grandi e problema ta cu cual nos mester lidia y pa cual nos ta sclama pa ayudo.

Atrobe ta resulta cu nos aparentemente no ta comprende cu nos ta deal cu Hulandes. Bo no por palabra algo anto despues, sin cumpli, ta bay reprocha nan algo. Con nan por tuma nos na serio…?

 

You May Also Like

Diferencia entre Hulanda y Aruba?

Tabatin un trafico intensivo entre Hulanda y Aruba den e dianan aki. Prome secretario ...

Nos ta bira ‘One happy landfill’?

O di berdad nos ta bay resolve problema di sushi… E dump (ilegal) na ...

Contrabanda di oro a cuminsa siman pasa?

O ta andando pa basta tempo caba… Cu nos kier o no, nos ta ...

editorial 2_15_1.jpg

Por haci algo den caso Señor Frogs?

Talbes accion internacional via internet?  Despues di diferente caso cu a capta atencion, manera ...

Turkia VS Hulanda: Mas cu un incidente diplomatico…

Hulanda a pasa den e fin di siman mas turbulento desde hopi tempo. E ...

Defensa di maneho gubernamental ta esencial

Debate debilita cu ausencia di AVP E noticia di ultimo ora cu e partido ...