Hulanda: Polis Hulandes ta violando privacidad di manifestante riba un escala masivo

(NLTimes) – Polis Hulandes ta violando e privacidad di manifestantenan riba un escala grandi cu reviso di ID inhustifica, monitor riba rednan social, vigilancia cu drone na manifestacionnan, infiltracion den gruponan di chat y bishitanan no anuncia na casnan segun Amnesty International a bisa den e reportahe tituloa Unchecked Power.

“Amnesty International kier pa e vigilancia no autorisa aki di manifestantenan pasifico stop inmediatamente y ser usa solamente ora ta sospecha crimen serio,” e organisacion di derechonan humano a bisa.

Amnesty International ta specificamente critico di e polis su tendencia di check e manifestantenan su documentonan sin causa. E informacion cu ricibi den e reviso di ID ta ser warda den e base di dato policial pa 5 aña, cu detayenan adicional poni den e base di dato municipal.

Entrevista cu varios manifestante entre september di aña 2020 te november di aña 2022 a mustra cu esaki ta pasa regularmente y ta contra e gobierno su promesa ora cu a implementa Wet op de Identificatieplicht (WID) den aña 2003. Gobierno a haci un promesa firme cu e revisonan lo ser permiti solamente si ta estrictamente necesario pa polis,” Amnesty Inernational a splica. “Polis regularmente ta pidi manifestantenan pacifico pa nan ID. Esaki no solamente ta viola nan derecho na privacidad sino tambe tin un efecto cu ta preocupa hende y ta causa cu nan no kier manifesta mas.”

Segun director di Amnesty International Netherlands, “polis na Hulanda tin un poder demasiado amplio pa determina pa nan mes ken nan ta stop y revisa durante manifestacionnan.” Esaki segun e director, ta crea un riesgo grandi discriminacion y abuso di poder. “Nos kier pa e revisonan di identidad ilegal pa stop.”

E organisacion di derechonan humano ta señala cu manifestacion ta un derecho fundamental na Hulanda. Sinemhargo e manifestantenan ta experiencia e accion di polis como intimidacion of frustrante. Na luga di secretamente vigila manifestantenan, Amnesty International ta sugeri polis enfoca riba nan tarea; Facilita demostracionnan for di un posicion di confiansa. “Demostracion ta un derecho, no un fabor.”