Manera tabata di spera, e diabierna di e siman aki tambe a trece su sorpresanan, e biaha aki for di Den Haag. Pendiente tabata e decision si nos ta haya e siguiente fondonan pa nos gobierno por sigui opera. Tension ta halto y esey tin su motibo. Manera nos a comprende di e noticianan, Hulanda no a bay di acuerdo sin mas cu loke gobierno di Aruba, y di e otro dos islanan ta propone. A bin condicion cu cual mester cumpli. Esey no ta e sorpresa. Esnan cu ta sigui e acontecimentonan di cerca lo a realisa caba cu nos ta den pleno ehecucion di supervision di cerca, unda ta tur luna ta fiesta, di duna cuenta anto. Manera CAft a conseha, nos a pasa basta keto di duna cuenta per kwartaal pa duna cuenta tur luna… Y esey no ta tur.

Segun cu nos ta sigui riba e ruta aki, lo ta logico cu Hulanda ta sigui preta mas, pa logra loke nan ta desea, en todo caso loke nan ta bisa nan kier logra, y esey ta cambionan structural cu mester bira garantia pa loke ta pasando cu nos awor, no ta bay sucede asina mas. Y esaki no ta mas cu logico, pasobra awor ta e oportunidad pa actua, pasobra e gobiernonan di e tres islanan lo mester haci caso di esun cu ta pone e placa grandi riba mesa. Claro cu esey no ta bay sin cierto gruñamento den banda di esnan cu ta añora nan famoso autonomia, pero finalmente nan ni mester reconoce mes cu asina e corelacion di forza ta actualmente.

Sin embargo, na ambos banda di Atlantico tin sonido diferente tambe den henter e asunto aki. Na Hulanda, atrobe, ta cuminsa tende esnan cu ta kere cu esaki ta un bon ocasion pa bay mas leu cu un simple gesto di ayudo, sincero o no, pero ta pensa cu esaki ta e momento pa lansa idea di algo otro cu e Reino Hulandes aki, cu e famoso Statuut como piesa cuestionable pa cierto di nan. Sin duda algun nos lo haya e sonidonan ey na nos banda aki tambe, segun e malcontento cu e exigencianan fuerte di Hulanda ta cuminsa fomenta malestar intestinal cerca cierto di nos.

Den e tempo nos dilanti nos lo haya mas di e ideanan aki, cu ta varia di restructura Reino te na independencia total. Nos no ta tanto participe den e debate ey, y esey tin su motibo. Ta asina cu hopi di e ideanan aki ta excelente material acompañante pa un bon glas di cerbez o biña, pero hopi biaha ta carece di realismo den e mundo manera e ta organisa rond di nos. Nos no ta bisa esey pa menosprecia, pasobra mihor tin debate cu no, pasobra asina nos ta haya sa di otro unda nos ta para cu nos ideanan. Na e pais aki ta haci hopi falta un debate abierto, y no henter ora segun e lineanan di partido politico, pasobra esey ta letal pa cualkier discusion bon intenciona.

E motibo pakico e discusion tocante posible cambio di structura den Reino ta relativo, ta pasobra na Hulanda, no tur hende pero sigur e partidonan den gobierno, sa masha bon kico ta e diferencia entre loke e partidonan politico aki ta vocifera, y unda e gran mayoria di e pueblonan den Caribe ta para. Laga nos purba formula esaki asina: si den tempo bon ningun partido politico a logra haya e poblacion asina loco pa join nan den un aventura di independencia, awor cu un crisis asina profundo manera esun actual, ta imposible pensa mes cu ta haya seguidor den algo asina. Di otro banda, na Hulanda esnan cu ta dirigi ta laga e extremistanan, cu ta desea di duna nos independencia via e-mail, papia cuanto nan kier pasobra na final di dia, nada no ta sucede si nos mes no kier. No ta tur politico na Hulanda ta conocedor di derecho internacional, pero esnan den gobierno si.

En todo caso, e situacion actual ta duna oportunidad pa maniobra entre e extremonan na ambos banda di e lama grandi, y pone esnan na encargo di e islanan bao presion pa cumpli cu loke nan ta propone. Naturalmente lo nos tende aki tambe di esnan cu lo bisa ‘cu ta cos malo so e Hulandesnan ey kier bay haci cu nos’. Pero nos ta duda cu nan lo haya tanto oido. Mayoria di hende sa masha bon di unda e ayudo lo mester bin, pa nos por sali di e desastre aki, y cu nos lo mester cumpli tambe.

Sin embargo, e no ta un asunto di cumpli so. Acaso no ta berdad cu loke ta cuminsa propone di banda Hulandes, ta loke nos mes mester a haci hopi tempo caba? Unda tur e cambionan a keda cu den pasado recien nos mandatarionan a priminti, pero nunca a introduci? Cosnan manera instrumento pa gobernacion drechi, supervision pa financiamento di partido politico, ley di Ombudsman, ley pa garantisa competencia leal den economia, etc. Y ken di nos sin mas lo defende e mas di 8.000 salario cu gobierno ta pagando tur luna? Nos gobierno no ta den e driver’s seat mas. Y nos autonomia? Excelente pa acompaña un bon cerbez o biña.

 

LEAVE A REPLY

Please enter your comment!
Please enter your name here