(NLTimes) – Fregata Hulandes Zr.Ms. De Ruyter, cu ta specialisa den defensa aereo y operacionnan di mando, ta ser mobilisa mas cerca di Medio Oriente, pasobra e por ser usa pa yuda garantisa seguridad di trafico maritimo den Esctrecho di Hormuz.
Actualmente e embarcacion ta nabegando for di Sur-oriente Asiatico rumbo pa e region como medida preventivo, segun minister di Defensa Dilan Yeşilgöz a informa Parlamento Hulandes den un comunicado por escrito. E minister a enfatisa cu ainda un decision final tocante si e fregata lo participa efectivamente den e mision no a ser tuma. Anteriormente, un minesweeper (un barco di marina cu ta busca y elimina mina den lama) a ser manda caba pa e region.
Segun Yeşilgöz, Hulanda ta participa activamente den preparacionnan pa un operacion multinacional den Estrecho di Hormuz, cu Francia y Reino Uni liderando e iniciativa. Tambe a ser anuncia cu ministerio di Defensa ta pone su dronenan Reaper (MQ-9) na disposicion di NATO pa compensa e falta cu a surgi despues cu Merca a retira parti di su capacidad di apoyo cu drone.
E sistemanan lo keda disponibel pa posible operacionnan di NATO dirigi na defensa di Europa, incluyendo den caso di un eventual atake Ruso. E aliansa a pidi specificamente e dronenan despues cu Merca a dicidi di no reserva nan mas exclusivamente pa uso Europeo.
Den coordinacion cu paisnan aliado, a ser conclui cu un fregata Hulandes cu capacidad di defensa aereo y mando por desempeña un papel importante si e mision sigui dilanti. Como consecuencia, e barco a tuma rumbo caba pa e paso maritimo strategico entre Iran y Emirato Arabe Uni, un trayecto cu lo dura varios siman.
E minesweeper Hulandes, Willemstad ta operando actualmente den e Lama Mediterraneo como parti di un mision di NATO enfoca riba localisa y elimina minanan maritimo. E barco por ser usa tambe den un posible operacion den Estrecho di Hormuz si ta necesario.
Sinembargo, cualkier decision pa desplega e barco, of pa manda embarcacionnan adicional, lo mester conta cu aprobacion previo di Parlamento Hulandes. Autoridadnan tambe a indica cu un paso asina solamente lo ser considera si e situacion di seguridad den e region ta suficientemente stabiel.
Forsanan Arma Hulandes ta opera cu cuatro drone MQ-9, cu normalmente ta basa na Base Aereo di Leeuwarden. Yeşilgöz a expresa cu varios di nan por ser desplega inmediatamente, aunke e no a kier specifica e cantidad exacto.
Dos di e dronenan actualmente ta desplega na Rumania, unda nan ta brinda apoyo na patruyanan di NATO banda di e frontera oriental di e aliansa. Nan lo keda eynan te fin di september.
Algun siman pasa, Merca a informa su aliadonan cu e lo reduci e cantidad di avion y embarcacionnan militar cu e ta mantene disponibel pa posible uso den defensa di Europa.
Como reaccion riba esey, e comandante militar di mas alto rango di NATO a haci un yamado na e paisnan miembro Europeo y Canada pa yena e bashi cu ta surgi como resultado di e reduccion den contribucionnan militar di Merca.
