William Erasmus di Ibisa a duna di conoce siman pasa cu aña 2020 lo cuminsa cu dos careda sumamente importante pa comunidad.

E prome careda ta e di 24 edicion di Betico Loop 2020, cu cual Erasmus a informa cu Ibisa lo haci algo nobo. Ademas di e 1.125 participante cu ta prepara nan mes pa e edicion di aña 2021, lo tin luga pa 1.250 participante. Erasmus a conta cu esaki ta un di e caredanan mas bieu di Aruba y cu ta hopi reconoci. Inscripcion a cuminsa caba cu un balor di 25 florin pa hende local y 20 dollar pa personanan stranhero.

E carera otro aña lo tuma luga na Centro Deportivo Betico Croes, diasabra 25 di januari pa 6or di mainta. Erasmus a duna di conoce cu si paga inscripcion prome cu dia 13 di december, lo haya nan nomber riba e bib pa por core cune, pa esaki keda como un recuerdo.

Participantenan lo haya un dry-fit t-shirt, bib number, chip y medaya di final. E distancia ta di 6 kilometer y 10 kilometer y lo tin premio pa diferente categoria.

E aña aki, por inscribi ekipo di cuatro persona den categoria di 10 kilometer, pero cu e condicion cu tur cuatro mester core e 10 kilometer y esun cu core menos tempo ta gana.

Ademas di Betico Loop, Erasmus a duna di conoce cu Ibisa tambe ta organisa International Half Marathon, cu e aña aki ta cumpli su 35 edicion. Tambe ta celebra esaki hunto cu Alhambra su aniversario number 35, cual lo tuma luga diadomingo dia 22 di maart di 2020 na San Nicolas pa 5.30 di mainta, consistiendo di 21.1 kilometer pa categoria individual.

E participantenan tambe por core cu ekipo di cuatro persona y cada un ta core casi 5.2 kilometer. E ruta ta desde caya Joe Laveist te cu Alhambra Casino, y e prijs ta di 35 florin pa hende local y 20 dollar pa personanan stranhero.

Di mesun manera, Erasmus a bisa cu ekipo di cuatro persona lo tin cu paga 100 florin y studiante ta paga 80 florin, tambe pa ekipo di cuatro, si kier paga prome cu dia 14 di februari lo haya nan nomber riba e bib.

Di e careda aki, Erasmus a anuncia cu tin un registracion te cu 100 atleta, ya cu ta un careda basta grandi, pero door di henter e parti logistico, mester sigui cu e cantidad di participante aki.

Pa hende por paga e inscripcion pa e dos careda, nan por pasa na Ibisa di Oranjestad of San Nicolas y na Patrishi Sports.

Tambe el a recorda cu participacion den careda aki semper tabata bon, cu un participacion di 900 atleta. Esaki ta representa un careda grandi cu hopi atletanan ta uza como prueba di nan mes pa haci nan mesun reto.