Diaranson ultimo, Iggy Azalea a duna un noticia cu niun hende tabata spera: e cantante ta un mama. Amethyst Amelia Kelly, nomber berdadero di e cantante, a comparti e informacion aki a traves di un storia riba su cuenta di Instagram.
“Mi tin un yiu. Mi a warda e momento adecua pa bisa algo, pero parce cu mas tempo ta pasa, mas mi ta ripara cu mi semper lo sinti ansioso pa comparti noticia di tal magnitud cu mundo”, el a skirbi na su mas di 13 miyon siguido.
Hunto cu esaki, el a agrega cu e no ta sinti berguensa pa su yiu, y cu mucho menos e tabata un secreto. Simplemente e tabata purbando di proteg’e di bida publico. “Mi kier mantene su bida priva, pero mi kier a laga na cla cu no ta un secreto y mi ta stim’e mas di loke mi por expresa cu palabra”, el a finalisa.
E cantante ta den un relacion cu e rapper Mericano, Playboi Carti desde 2018. Segun E!News, tabata na december 2019 cu a cuminsa sali rumornan cu e pareha tabata sperando un yiu. Sinembargo, ningun di nan dos a confirma of nenga e rumor.
Pero Azalea a sigui post riba Instagram sin su pareha ni su yiu.
Sinembargo, den un entrevista cu e revista Fader, Playboi a papia di su relacion cu Azalea y a revela cu e pareha ta biba hunto na Los Angeles desde december 2018. El a admiti cu nan relacion ta solamente personal, nan no a haci musica hunto y no tin plan di hacie.
E pareha no ta hopi activo riba rednan social, y ningun di nan dos a duna otro declaracion tocante nan yiu. Ademas di e potretnan publica, Azalea a usa Twitter pa papia tocante asesinato di George Floyd y a promove algun peticion exigiendo husticia.
