Diahuebs ultimo a tuma luga na Zoutmanstraat 1 e Inauguracion di e edificio cu ta bira oficinanan di Directie Ouderenzaken. Prome Minister Evelyn Wever-Croes tawata presente y a duna un splicacion di e vision di Gabinete Wever-Croes y e accionnan cu a wordo tuma ya caba desde Gabinete Wever-Croes I.

Den deliberacionnan pa forma gobernacion di Gabinete Wever-Croes II na 2021, a dicidi tambe pa encarga un minister specifico pa asuntonan di adultonan mayor debi principalmente na e vergrijzing y pa duna debido atencion na e necesidadnan y bienestar di nos adultonan mayor. Esaki ta un idea di Minister Ursell Arends kende a sigui traha riba esaki den e prome aña di gobernacion pa asina crea e trankilidad y bienestar di nos adultonan mayor. Minister Arends tawata tin un bunita vision y a pone accion tras di su palabra cu hopi curashi y determinacion pa asina awo por habri e oficinanan di Directie Ouderenzaken.

“Nos grandinan a cuida pa nos tempo cu nos mes tawata chikito y awo ta nos tempo y responsabilidad pa cuida pa nos grandinan. Y esaki exactamente ta loke Directie Ouderenzaken lo haci. Nos ta aki na ocasion di inicio di celebracion di luna di Adulto Mayor y e traspaso simbolico di e yabi di e edificio nos tras na Zoutmanstraat 1”, Prome Minister a duna di conoce.

Dia 14 di december 1990 Asamblea General di Nacionnan Uni a designa 1 di october como Dia Internacional di Adultonan Mayor. E gobierno aki a bin ta reconoce cu ta su tarea pa garantisa cu nos adultonan mayor mester tin e calidad di bida halto cu nan merece. Den nan hubentud nan a contribui na biennestar di Aruba y awor ta nos turno pa dedica atencion na nan.

Un calidad di bida miho ta abarca diferente aspecto manera: facilidad adecuado pa biba; purba evita biba den isolacion: accesibilidad di nos edificionan; o cuido dedica pa menciona algun.

Den su esfuerso pa garantisa esaki, Gabinete Wever-Croes I, bao maneho di Prome Minister, ya caba a tuma e iniciativa pa bin cu un Raad voor Ouderen (RaVO). Gobierno ta wardando riba e conseho final di DRH pa formalisa e cambio den e constelacion di e secretariado di SER cu lo ta e instancia cu lo duna RaVO e apoyo administrativo mescos cu e ta dunando SER na e momento aki.

E Directie Ouderenzaken cu lo wordo institui awor su tarea lo ta diferente cu RaVO. RaVO lo dirigi riba tereno di beleid mientras e tareanan di Directie Ouderenzaken lo ta mas hands-on cu un envolvimento y intercambio directo cu e adulto mayor.

Gobierno a anuncia recientemente algun decision na beneficio di nos pensionadonan. Entre otro lo baha tarifa di inkomstenbelasting y loonbelasting, hisa e suma cu ta liber di impuesto, aumenta reparatie toeslag pa pensionadonan, den caso cu ta pensionadonan cu ta pareha casa, awo e pension ta wordo conta hunto cerca esun cu tin entrada mas halto. E cambionan aki ta drenta na vigor entrante januari 2023 y lo causa un alivio financiero sumamente grandi pa nos pensionadonan.

“Nos a priminti cu nos lo baha e peso di impuesto y asina poco poco, a pesar di tur e retonan financiero cu nos ta enfrenta, nos ta cumpli. Pabien na Minister Uresell arends y tur e ekipo di Directie Ouderenzaken tur clase di exito den nan tarea na bienestar di nos adultonan mayor.

Na final, Prome Minister a recita un dicho di Carroll Bryant: ‘Growing old is mandatory but growing up is optional’. “Esaki sin embargo no ta implica cu nos no por keda pa semper “young at heart”. Prome Minister a enfatisa.

LEAVE A REPLY

Please enter your comment!
Please enter your name here