Te cu siman pasa, cuerpo policial di Puerto Rico a reporta 438 asesinato pa 2017, di cual 10 a tuma luga den e siman ey. E cifra ta representa cuatro asesinato menos, compara cu aña 2016 pa e mesun fecha.
E Instituto di Estadistica di Puerto Rico a anuncia cu den ultimo añanan e cantidad di asesinato, relaciona na tamaño di poblacion, tabata mas o menos tres biaha mas halto cu na Merca. Basa riba e datonan di e Instituto di Ciencia Forense, e tasa di homicidio na Puerto Rico na 2013, ultimo aña pa cual tabatin cifra completo disponibel, tabata di 17.1 pa cada 100.000 habitante, mas di tripel compara cu e tasa ekivalente pa Merca den su totalidad (4.9).
E preocupacion pa e desaroyo di delincuencia cu consecuencia fatal a conduci na institui un entidad special, Sistema di Vigilancia di Morto Violento, pa reuni dato relevante pa e tema.
Aunke e tasa di homicidio ta mustra halto en comparacion cu Merca, ainda Puerto Rico ta aleha di e lidernan den region, manera Honduras (60 pa cada 100.000 na 2015), o Jamaica (36.1 pa cada 100.000 habitante na 2016).
