(AP) — Cabesante di Banco Central Europeo a bisa ayera cu e no ta kere cu inflacion a peak despues di alcansa e nivelnan mas halto riba record.
Presidente di e ECB, Christine Lagarde tambe a bisa legisladornan Europeo cu e banco no a termina di aumenta tasanan di interes pa combati e aumentonan di prijs.
Tin demasiado incertidumbre pa sa si inflacion, cu a alcansa 10.6% na october, lo baha pronto na e 19 pais cu ta usa e euro, Lagarde a bisa. Mirando kico ta impulsando inflacion, “sea ta cuminda y comodidadnan en general, of sea ta energia, nos no ta mira e componentenan of e direccion cu lo hiba mi na kere cu nos a alcansa e peak di inflacion y cu e ta bay baha pronto”, el a bisa.
Esey ta nifica cu e ECB ta bay “continua mitigando inflacion cu tur e hermentnan cu nos tin”, principalmente aumento di tasanan di interes, Lagarde a bisa e Comite riba Asunto Economico y Monetario di Parlamento Europeo.
Despues di e tercer aumento di tasa mayor di e banco na october, marcando su velocidad mas rapido pa aumento den historia, ECB ta spera “di aumenta e tarifanan mas ainda na e nivelnan necesario pa sigura cu inflacion ta bolbe na nos obhetivo di 2% a termino medio di forma oportuno”, el a bisa.
ECB a join e US Federal Reserve y otro banconan central rond mundo pa rapidamente aumenta tarifanan pa combati inflacion cu a aumenta mientras economia global tabata recupera di e pandemia di Covid-19, cual despues a empeora na momento cu Rusia a invadi Ucrania. Banconan Central ta core riesgo di pusha economianan den recesion mientras mundo ta bataya un crisis di energia, prijs mas halto pa cuminda, y monedanan debilitando contra e dollar Mericano.
Organisacion pa Cooperacion y Desaroyo Economico basa na Paris a pronostica cu economia internacional ta bay expande cu apenas 2.2% proximo aña. Mayoria di economista ta spera un recesion na lugarnan manera Europa, Merca y Reino Uni proximo aña, cu vicepresidente di ECB, Luis de Guindos bisando e luna aki cu riesgo aki “a bira mas probable” den eurozone.
